裕美哭訴：我搞緊離婚
歌手裕美2013年下嫁圈外人林恩浩，近日為無綫拍劇的她卻與無綫上位藝人黃子恆鬧出緋聞，更被目睹到男方西貢寓所密會。裕美昨日回應時突然自爆正與老公辦理離婚手續，哭訴夫妻關係欠佳，但就處處維護黃子恆是正人君子。
今年27歲的歌手裕美是中日混血兒，在香港長大的她2002年參加普通話歌唱比賽奪冠後入行，惟星運平平，最爆事件莫過於被揭當年會考得零分！2013年底裕美下嫁同是基督徒的圈外人林恩浩，今年初裕美再度活躍娛樂圈，努力狂操的她身形弗到爆，更被發覺變靚不少，但「有變」的原來還有其身份，聲稱由人妻變單身，她日前被目睹與無綫正值上位的男藝員黃子恆攬腰到街市買餸，兼到男方家中密會而鬧出緋聞，驚爆婚變。
裕美昨日回應與黃子恆的緋聞時，矢口否認：「我哋係冇嘢嘅。」她透露當日是搞大食會：「當時係一班人買餸，我冇喺佢屋企過夜。（買餸時佢攬你腰？）係角度問題。（佢追你？）唔係，佢係我好朋友，佢個人好謹慎。（佢有冇女朋友？）唔清楚。」而正為無綫拍攝新劇《心理追兇》的裕美，坦言不時向黃子恆請教拍戲心得。
婚變涉第三者？我唔係
問到爆緋聞可擔心老公林恩浩介意？裕美初時說：「唔會嘅。」再被追問時，她驚爆：「單身咗半年以上，依家辦緊離婚手續，最唔開心時間已過，同老公發生問題嗰時我日日都喊。（離婚係咪你有第三者？）我唔係。（你老公有第三者？）唔回應，只可以答我哋性格上出現問題，唔係表面睇到咁好，我有努力挽救過呢段婚姻，但都冇辦法。」
對於高皓正談及她與黃子恆的緋聞時無心快語一句「搞人老婆就係唔啱」，裕美驚訝地說：「佢咁講？唔係嘛，累死人哋喎，我同阿正好耐冇聯絡，亦冇同佢傾過呢件事。（佢話你未離婚？）佢點會知呀？」裕美又激動得在電話中爆喊：「因為自己嘅宗教信仰，搞離婚會受壓，所以一直唔想講，啲人知結過婚，仲邊有人會要我呀？」雖然她最初表示與老公還是朋友亦有見面，但後來又改口說與老公「關係唔好」：「我唔想提佢。」反而卻處處維護黃子恆：「我用人格擔保佢係好人、正人君子。（佢有冇搞過你？）冇，我覺得唔好意思，同佢係朋友，亦唔係發展中，只係工作上朋友，依家累到佢，我依家係單身。」
曾患情緒病萌輕生念頭的裕美透露沒有復發迹象，剛簽約新經理人公司的她表示會重新出發，努力工作賺錢供養母親，不需要老公給她贍養費，她說：「我同佢一向財政獨立。」
口徑一致嗌無辜
事件主角之一的黃子恆，昨日接受本報記者訪問，他指當日是朋友食飯，只是其他朋友沒有被影，至於攬裕美腰？他與裕美同一口徑回應：「冇咁嘅事，角度問題啫！」並否認裕美於其家過夜，雖然二人相熟，但不知道對方正辦理離婚手續。問到將來有否發展機會？他說：「不嬲都係朋友。（呢件事自己好無辜？）成日都好無辜，對方結咗婚都可以有正常社交聯誼啫！（以後避忌啲？）呢行都冇辦法。」他坦承曾跟裕美單獨約會，但只是正常社交。另外，提到高皓正的言論，黃子恆說：「搞人老婆一定唔啱，總之我冇搞人老婆。」他又指有跟裕美聯絡：「佢都好唔開心，佢身份更加尷尬佢都好無辜。」
文：音樂組、影視組
|
鍾意就快D Share啦！
|
|
|
