掃呢頁CODE去手機

2016年6月9日 星期四

暑假 5連撞 古天樂夠霸戲 [壹週刊 - 1370] __,古天樂,M1,

多產王古天樂,今個暑假檔期有五套戲上畫,破晒紀錄。娛樂偵訊暑假5連撞 古天樂夠霸戲被指身家過六億,古天樂近年繼續密密做密密賺,可以同期連踩三部戲,已取代劉華成為圈中頭號鐵人。試過賀歲檔有三部戲的古仔,今個暑假黃金檔,更加不得了,有五套戲,包括《三人行》、《使徒行者》、《危城》、《S風暴》同《封神傳奇》,仲未計正在趕工的《喵星人》,名副其實係「戲霸」。破晒紀錄今個暑假檔期,將有十套華語片先後上畫,古 ...


多產王古天樂,今個暑假檔期有五套戲上畫,破晒紀錄。

娛樂偵訊

暑假 5連撞 古天樂夠霸戲

被指身家過六億,古天樂近年繼續密密做密密賺,可以同期連踩三部戲,已取代劉華成為圈中頭號鐵人。

試過賀歲檔有三部戲的古仔,今個暑假黃金檔,更加不得了,有五套戲,包括《三人行》、《使徒行者》、《危城》、《 S風暴》同《封神傳奇》,仲未計正在趕工的《喵星人》,名副其實係「戲霸」。

破晒紀錄

今個暑假檔期,將有十套華語片先後上畫,古天樂有份的佔五套,破晒紀錄。不過,自己打自己,據知,古仔擔心影響票房之餘,要為分身跑宣傳而頭痕。

「上年賀歲檔,古仔已經有《衝上雲霄》、《浮華宴》同《 12金鴨》三套戲撞晒,咁撞法,對票房都唔係好事,今次仲要有五套戲,其中《危城》同《 S風暴》都係動作片,古仔都好頭痛,唔知到時點分身。」古天樂身邊人說。

先由七月十四日上畫,杜琪峯執導的《三人行》打頭陣,飾演 O記督察的古仔自稱在戲中甚少對白, cool到爆!仲有「毒打」對手趙薇戲份。接住輪到開拍時已鎖定是暑假片、八月十一日上的電影版《使徒行者》,古仔、吳鎮宇加張家輝孭飛、女主角佘詩曼,卡士夠照!

跟住隔一星期(八月十八日),有古仔、劉青雲同彭于晏合演的《危城》,戲中古仔做軍閥「曹少帥」,做奸角;至於賣 3D,群星拱照向佐的《封神傳奇》,古仔只是客串。最後,由《 Z風暴》續集《 S風暴》守尾門,八月二十八日上映。

《使徒行者》電影版,除古仔外,仲有張家輝同吳鎮宇孭飛,淨係牌面都夠照。

《 Z風暴》續集《 S風暴》,加入了張智霖、蔡少芬等,在暑假守尾門。

煞科戲,阿佘同古仔池邊相遇,阿佘泳衣上陣,罕,但實在太多布!

動作片《危城》,古仔飾演奸到出汁的軍閥,有大量打鬥場面。

硬食波餅

據了解,古仔旗下電影公司「天下一」有份投資的新戲《喵星人》,原本亦有意排隊在暑假檔上映。為此,古仔日日趕戲。早前劇組在香港仔運動場拍外景,當日戴住假髮的古仔,著住運動衫,同「萬寧貓」做對手戲。

嚴防新戲造型曝光,劇組包起整個運動場,又在球場外圍封黑布。

當日,拍人貓鬥射龍門,負責守龍門的古仔要吊威吔,在龍門前左撲右撲。其間,更被個波「省中」,硬食波餅的古仔,之後仲笑笑口,抖都唔抖又再拍過。

古仔同趙薇合作的《三人行》打頭陣,在 7月中上畫。

古仔最近日日為新戲《喵星人》埋位,戴住假髮的他,和導演陳木勝有傾有講。

早前古仔在運動場同「萬寧貓」拍對手戲。

趕尾班車

「套戲比預期中多阻滯,由四十組加到六十組,電影公司原本都想趕尾班車上暑假檔,不過套戲有好多特效,後期功夫好多,未必趕到」一名劇組人員說。

拍完《喵星人》後,古仔接住要開拍陳木勝執導的《矛盾戰爭》,還有改編自《未來報告》的《少數派報告 2017》,古天樂已完全由「黑人」變成「鐵人」。

上年賀歲檔,古仔便試過連孭三套戲,包括《浮華宴》、《衝上雲霄》,加埋客串演出的《 12金鴨》。

中國星投資的《封神傳奇》,由老闆仔向佐孭飛做男主角,搵咗古仔、黃曉明、范冰冰、 Baby等群星拱照。

撰文、攝影、攝錄:娛樂組


鍾意就快D Share啦!