港媽：贏在射精前惹爭議 千嬅：最緊要BB健康 思琦：節目啱家長睇
無綫真人騷節目《沒有起跑線？》前晚首播，當中懷有第二胎的母親Irene發表「贏在射精前」言論，引起不少網民爭議，反應兩極，有人指純粹反映現實，亦有指過分緊張怪獸家長表現，身為人母的楊千嬅和楊張新悅則認為任何月份出世的小朋友在學習上都不會受影響，主要是受訪者個人意見，最緊要小朋友健康、快樂成長，而楊思琦亦認為不應該計算小朋友出生月份，稱讚節目寫實會繼續追看，可以從中分析其他家長的看法作參考。
無綫前晚開始播放一連五集的真人騷節目《沒有起跑線？》，節目探討現時家長如何催谷小朋友，令下一代進入所謂的「人生勝利組」，而節目中的母親Irene沒有催谷過大仔，直至兒子參加幼兒班面試時，方驚覺兒子已輸在「起跑線」，故懷有第二胎時揚言要「贏在子宮裏」，並帶出有媽媽指要生一月份出世的BB，做「大仔」搶閘入好學校而要「贏在射精前」！節目播出後觀眾反應兩極，引起極大爭議。
育有一子的楊千嬅昨晚出席活動時，對於「贏在射精前」言論，她說：「咁得人驚？概念好唔啱，我覺得有啲家長要擇日開刀，為咗想小朋友同自己生肖一樣已經好誇張，我個仔六月出世，好明顯我係唔理呢啲，最緊要佢健康開心。」問她幾時開始再造人？她表示完成今年工作才打算。同場的前藝人楊張新悅亦指言論好恐怖：「好荒謬，有小朋友係禮物，唔通要份禮物仲要理點包裝？我有個女一月出世，有個九月出世，我唔覺得九月出世會特別吃力，最緊要健康。」
唔會計幾時出世
楊思琦的女兒正讀K1，她說：「緊張都會緊張，但真係冇諗過『贏在子宮裏』呢啲嘢，好誇張，要計到個BB幾時出世，唔會咁做，以前搵學校自己都有準備，但就冇節目中啲家長咁緊張，我有興趣繼續收看節目，都幾啱家長睇，睇吓大家諗法、內心世界係點。」而育有一女的郭羨妮聽完都覺得好大壓力，並說：「順其自然我不嬲唔想咁大壓力話要去鬥、揀學校，最緊要小朋友開心、快樂，所以自己唔會逼個女，讀邊間學校都好，最緊要努力讀書。」
與Irene同樣懷孕的張嘉兒前晚亦有收看，她直認香港的小朋友競爭大，不過建立小朋友的自信、品德及溝通技巧比學習不同技能及興趣更重要，懷胎六個月的她亦未想過要小朋友學甚麼，只想讓小朋友多接觸運動。
怪獸家長確存在
至於主角Irene昨日亦有在社交網留言，表示多謝大家關心，但節目出街後感到很大壓力：「有人焦點落喺『怪獸家長』係好事，因為大家討論怪獸家長存在問題，係節目希望帶出嘅事，而有人焦點落咗喺我呢個媽媽度，成件事錯晒……仲要人身攻擊。」Irene事後接受訪問時稱：「自己做父母仲有進步空間，睇咗網上留言，我都有反思，不過我想講我好錫我個仔，我亦都唔係怪獸家長。」
節目監製張志明指節目反映實況、以真人騷形式拍攝，並沒有誇張，時下的確有此情況。而編導岑應則有點擔心Irene，她稱：「因為佢大緊肚，唔希望刺激到佢，希望網民放過佢」無綫公布該節目最高收視有17.7點（約115萬觀眾收看）。而通訊事務管理局截至昨日接到三個投訴，主要投訴內容用字粗鄙、內容偏頗及嘩眾取寵。
文：影視組
|
鍾意就快D Share啦！
|
|
|
