林作快啲氹番女友麥明詩
「十優港姐」麥明詩（Louisa）最近忙於在深圳拍無綫新劇《賭城群英會》，但律師男友林作卻在港與女性朋友Victoria（余穎洋）夜蒲銅鑼灣「斷正」，令到Louisa「嬲嬲豬」，二人一年多的感情即受到考驗，再加上他倆分隔兩地已有一個多月，這段時間未能當面解釋成為林作的「危險期」，正當女友拍完劇返港，林作即相約食飯，前晚二人相約在中環，可是飯聚至中途，Louisa情緒突然變得激動，更當眾喊起上嚟，不斷飲泣，林作因而手足無措，要氹女友補鑊。
「我都唔知佢點解喊」
《東網》致電林作了解，他未有承認「被飛」，但卻自喻為「被告」等女友判決，還苦笑謂對感情是否能挽回只得「五五波」，他說：「我都唔知佢點解喊，食飯過程我哋乜都講，當然有講我上次同Victoria一齊件事，女友係有嬲但唔係攤牌亦冇講分手，我哋溝通中囉！（有信心挽回女友？）五五波我依家係被告，要等女友判決，我哋拍拖一年幾，我當然唔想被飛啦，我好希望再同女友溝通。」
否認同林作攤牌
問到麥明詩是否有爆喊﹖她說：「唔係，有啲情緒啫。（同林作攤牌？）唔係，大家傾吓件事，有時睇相只係好片面，想了解清楚件事。（同林作關係有冇改變？）順其自然啦。（會唔會分手？）都係順其自然啦。」麥明詩似乎仍未嬲完，看來林作要好好想辦法氹番女友。
來源 source: http://hk.on.cc
|
鍾意就快D Share啦！
|
|
|
