石天欣爆大鑊 揭做偽人遭滅聲
無綫前御用「被強姦受害人」石天欣，近日為撐何韻詩的Lancôme風波與內地網民開火，在微博遭內地網民狂鬧醜樣奀星及不愛國，石天欣前晚爆seed還擊，反問是否愛國就會紅？原來，自認黃絲的她日前在Instagram大爆前經理人在雨傘運動時禁她發聲，但石天欣不想做「偽人」而未有理會。無懼講真話的她昨回應：「你唔出聲但自己唔開心，賺到錢都冇用，返唔到內地做嘢咪返唔到囉！」
何韻詩遭Lancôme無理取消其音樂會風波，至今Lancôme仍未作出回應，但就引發無綫前御用「被強姦受害人」石天欣與內地網民開火。在前年雨傘運動，石天欣遭「藍絲」將她於劇集《仁心解碼II》被姦劇照當成被「佔領人士發洩情慾」的照片，前晚她突然在微博爆seed說：「剛才發現原來在微博byebye Lancôme，可以消毒自己微博。其實我覺得每位翻牆上面書罵香港人不愛國的人更神奇，因為偉大的祖國不讓大家翻牆，你們欲來罵我們，你們不覺得有問題的嗎？有人說我想紅？那愛國就會紅嘛？愛國你就發大財了嘛？拜拜微博，回去Instagram了！」
■自認黃絲的石天欣，近日為撐何韻詩而與內地網民開火，她更自揭曾因立場不同，而遭前經理人滅聲。資料圖片
遭內地網民狂插石天欣突然爆seed，全因力撐阿詩，本月7日她在微博轉貼Lancôme指何韻詩不是代言人聲明，並貼上多個dislike圖案，結果惹內地網民圍剿，狂插她醜樣、奀星和不愛國，石天欣於是在微博還擊。原來，石天欣日前已在Ig表態：「我都係黃絲，你係咪都要叫我港獨？呢幾日嘅報道真係令我諗起自己。前年撐雨傘運動，但前經理人公司唔畀我講我撐。因為佢係撐警，又話驚影響我工作，所以叫我唔好去嗰度，唔好講我支持嘅說話，但我都冇理，我照去，因為我想對得住自己，我唔想自己後悔。」
■石天欣前晚在微博留言byebye Lancôme，反擊內地網民。
■縱使前年被前經理人禁發聲，石天欣仍未有理會力撐佔中學生。資料圖片
■何韻詩被Lancôme無理取消音樂會，日前引發多個團體抗議示威。資料圖片
之後石天欣又提到何韻詩：「我哋唔係忽然變咗佢fans，而係我哋都係因為問題出現而去撐，撐我哋自己嘅香港，撐香港人。我只係想講真話，由前年起，我有認真正視，如果我繼續喺香港做一個藝人，我係咪要做一個偽人、講一啲唔係真嘅說話？我可能寧願做一個100％嘅普通人，去做一個真嘅石天欣。」前年9月，石天欣離開無綫後簽約新公司星秀堂，今年初約滿後未有續約，她回復自由身接job。
「賺到錢但唔開心」記者前晚致電石天欣，對於力撐何韻詩，她說：「其實你搵佢都知㗎啦，咁點解會之後先嚟取消呢？咁你取消都要畀個交代嘛。」問可擔心日後不能返內地工作？她說：「呢件事喺雨傘運動已經有諗過，因為我嗰時係支持嘅，但係有人係唔畀我發聲。我都掙扎過一排，唔出聲但自己唔開心，賺到錢都冇用，所以返唔到內地做嘢咪返唔到囉，或者就算做唔到呢一行，但起碼我講到我想講嘅嘢，我做到我想做嘅嘢。」至於疑禁石天欣發聲的星秀堂發言人曾小姐，昨回應說：「每個人有自己發言權，適唔適合自己決定。」石天欣昨日再於Ig留言，指byebye Lancôme言論後自己被封300線奀星及醜樣，並自嘲說：「我明明就乜嘢線都冇，黐線就可能有，靚又不嬲都唔關我事。」又強調「我不後悔」，認真有guts！
採訪：嵐山
■石天欣是無綫前御用「被姦受害人」，3年前一張《仁心解碼II》被姦劇照，竟被網民當真，揑造新聞。
|
鍾意就快D Share啦！
|
|
|
