梁嘉琪唔妥張秀文割席！
無綫資訊節目《學是學非》六位是非精看似非常老友，但其實相處日久摩擦多多，最近有傳張秀文因維護湯洛雯而跟梁嘉琪反面！昨日嘉琪出席活動，講到秀文的緋聞即時「嚟料」，退後兩步稱兩人只是同事關係不算Friend，擺明要跟對方割席！秀文得悉此事亦暗寸：「佢個人好安全嘅，不嬲怕死！」
女人多自然是非多？無綫資訊節目《學是學非》於2013年開始時由三位「是非精」梁嘉琪、李佳芯及黃心穎擔大旗，其後加入麥美恩（Mayanne），到2014年底再加入張秀文（Sammi）及湯洛雯（Roxanne），六女鏡頭前經常出口互寸，似是為增加節目趣味，但其實暗藏爭出鏡、爭排位、爭對白、爭服裝，相處得耐倍添摩擦。最近有傳嘉琪不滿Roxanne轉數慢、口才欠佳而杯葛她，Sammi為維護Roxanne而跟嘉琪不和！
「同事嚟o架咋」
近日Sammi被拍到與緋聞男友兼前經理人Victor約會掃貨，男方更攬她一下，疑似拍拖。昨日嘉琪、Roxanne及Mayanne出席戒煙活動時，講到Sammi的緋聞，嘉琪突然劃清界線，退後兩步並指着Roxanne、Mayanne說：「你哋兩個Friend啲喎！」Roxanne即笑問：「你唔Friend咩？」嘉琪繼續發功，擰頭笑說：「同事嚟o架咋！」Mayanne忍不住問：「你割席呀？」嘉琪笑而不語，按着心口回應：「我都想知（Sammi係咪拍拖）。」並指着Roxanne說：「佢有冇我都唔知」最後再加一腳：「總之佢（Sammi）開心就得」至於Roxanne及Mayanne亦表示不知Sammi戀情是否屬實。
對於嘉琪連番暗寸兼割席，Sammi昨日在電話中表現愕然，並說：「佢話同我唔熟，咪唔使答囉！佢個人好安全嘅，不嬲怕死！（你哋不和？）我對佢冇嘢，佢有冇嘢我就唔知。（佢嫌棄Roxanne轉數慢？）應該唔會啩，咁呢個係Roxanne特色，有時佢嘅反應好得意，個節目咪好睇囉！」
感情Dry到裂
而Sammi昨日到會展出席《香港動漫電玩節2016》記者會，身穿紅色低胸裝化身「冒險女神」騷34D身材，上衣更跌跌吓危危乎！講到與Victor的緋聞，Sammi解釋只是好友，但全程笑晒，言談間似留有發展空間：「佢做我經理人咁多年，清楚咩適合我，當時我不斷講嘢，佢嫌我長氣，就嚇我話信唔信喺銅鑼灣最多人嘅地方攬我，結果疊一疊嗰下真係被人影咗，我已經推開佢o架喇！（Victor追你？）唔係，好Friend啫！（有冇發展機會？）Er……冇傾過喎！我又唔係唔拍拖唔得，但大家咁關注我哋，係有啲壓力，依家唔敢出街，我就嚟Dry到裂，已經冇咩異性朋友。（就算拍拖都未必認？）要睇埋對方，如果係圈中人就好啲。（Victor係咪你杯茶？）我不嬲唔係睇樣、睇地位，係要心靈伴侶。（佢爭啲咩？）佢做朋友係perfect，但拍拖可能個人又唔同，我比較慢熱，要再了解，唔係咁易認定一個人。」問到今夏會否接泳衣騷？Sammi稱檔期尚未配合到：「都要緣分，睇吓公司同客戶傾成點。」
文：影視組
採：音樂組
|
鍾意就快D Share啦！
|
|
|
