上集我哋就考過發哥周潤發通識問題，今集佢就會分享吓自己嘅養生秘方。原來發哥平日除咗做好多補到標鼻血嘅運動之外，佢為咗唔做「賤人」，仲變到好細食！記者：倩宜 攝影：馮峰、Neo、陳順禎 上年先開始學跑步嘅周潤發（發哥），話自己已經上晒癮，每日唔跑番半個鐘都周身唔舒服：「跑咗之後呢上咗癮，點解呢，因為跑嘅時候有個胺多酚走咗出嚟，我入面隻鬼到時到候就叫你，如果唔去周身唔舒服，跑完個人好開心。」本身185磅嘅發哥，自開始做運動之後就瘦咗好多，最輕嗰陣仲得148磅。操到咁fit唔通想學張家輝？發哥話：「因為我見到曹星如好靚仔好弗呀，主要我做肌肉訓練，係想保護我啲骹位，舊時做好多槍戰片唔識揸槍，搞到傷晒，依家做番啲運動，操番啲肌肉保護我啲關節。」咁平日會唔會同埋發嫂一齊跑步？發哥即刻好抵死咁話：「我唔同得佢跑，佢跑得好快，佢爭啲貴利數多嘛，佢要跑山呀！你知我就好少借錢啦，我就冇咩爭貴利數，所以好悠悠閒閒咁走，佢就大鑊喇，借落好多通街數，一走起嚟最快嗰個劉易斯都追佢唔到。」既然個body就靠做運動keep，咁個靚仔樣又點keep先？點都有食啲補品同敷下面膜啩？「我咩都唔食，又唔食補品，我淨係飲水，八杯水就最基本。除咗一三五去跑山做呢啲帶氧運動之外，二四六我就去做肌肉訓練，每日呢啲就係補品嚟，呢啲有時補到你標鼻血喇！」發哥話以前明朝同清朝嘅人，一日淨係會食兩餐：「因為以前冇電，佢哋晚飯都好早食，所以以前會食三餐嗰啲叫賤人，點解叫賤人呢，因為佢哋梗係風花雪月，點晒洋燭call晒啲小姐嚟陪佢食飯，所以舊時食三餐嗰啲呢就係賤人。」【睇埋呢條】
賭神原來唔識賭啤 發哥自揭「捕獲路線圖」
http://bit.ly/29t4koi
|
鍾意就快D Share啦！
|
|
|