掃呢頁CODE去手機

2016年8月4日 星期四

大劉坐嘉麟樓 食住嘉道理 [壹週刊 - 1378 - 財經] 大劉,M1,劉鑾雄

大劉轉到半島酒店內的嘉麟樓食飯,與友人飯後,會叫人家先走並說:「我好論盡,要慢慢呀!」中環人語大劉坐嘉麟樓 食住嘉道理大劉唔去福臨門,改以嘉道理家族旗下半島酒店入面嘉麟樓為「新飯堂」,識佢嘅人都知怕觸景傷情,母親葉淑婉去年過身,以往拖住阿媽入福臨門的溫馨情景已不復再,又有人搞搞震傳呂麗君離他而去,真係要贈大劉一首歌《相思淚》:情人別去後人消瘦……加上服侍開佢嘅福臨門廚師都退休,倒不如搵個新竇啦,揀 ...


大劉轉到半島酒店內的嘉麟樓食飯,與友人飯後,會叫人家先走並說:「我好論盡,要慢慢呀!」

中環人語

大劉坐嘉麟樓 食住嘉道理

大劉唔去福臨門,改以嘉道理家族旗下半島酒店入面嘉麟樓為「新飯堂」,識佢嘅人都知怕觸景傷情,母親葉淑婉去年過身,以往拖住阿媽入福臨門的溫馨情景已不復再,又有人搞搞震傳呂麗君離他而去,真係要贈大劉一首歌《相思淚》:情人別去後人消瘦……加上服侍開佢嘅福臨門廚師都退休,倒不如搵個新竇啦,揀嘉麟樓其實多少因為嗰度係大劉威水戰場。

持有半島酒店的大酒店( 45),八十年代由嘉道理家族(佔 12%)和梁昌兒子梁仲豪(佔 30.4%)共同持有,梁氏負責地產,嘉道理掌管酒店業務,互有默契,相安無事;至八七年,梁氏把手頭 30.4%大酒店股份售予大劉,繼而展開一場狙擊戰,大劉聲東擊西,要求加入董事局,嚇到嘉道理家族鼻哥窿都冇肉;最後嘉道理家族也息事寧人,假手第三者向大劉接下大酒店三成多股份才得以脫險,狙擊大酒店一役,大劉以新進梟雄之勢,令老牌家族跪低而響朵,所以坐喺半島酒店入面嘅嘉麟樓,緬懷吓過去威水日子,點都好過踎福臨門嘅。

昔日與母親(右二)和呂麗君(右一)到灣仔福臨門,現時恐怕觸景傷情。《蘋果日報》圖片

嘉麟樓的樓底高,不少食客認為風水好,廚師曾在灣仔福臨門、日本福臨門及日本半島酒店做過。

中環寸嘴:唔係三次創作 係 N次創作

工廈大王楊耀松長子,游走高級酒店、銀行及知名食肆,與各路人士打交道,自認有 jet set生活方式,透過美酒佳餚,察看人生百態,把「生平絕學」不吐不快與粉絲分享。

趁個老友個會籍快到期唔再續,再去多趟薄扶林中華廚藝學院,嗰度俾學生實習,料靚分量足,十五蚊一杯羅漢果茶,仲會不斷 free flow任添,最衰唔就腳,假日冇得玩,照計呢個會抵入㗎,都叫做俾個機會啲學生實戰一下,提升吓香港食肆嘅水平。

咁啱線,美食車先導計劃班評判都喺中華廚藝學院食晏,準備公布入選美食車申請者,不過睇入選美食車菜式,唔夠國際化,全部都係延續本土特色,又唔夠創意,講到鋪天蓋地,攞晒頭彩嗰個「黯然銷魂漢堡」,真係仲抄緊周星馳廿年前《食神》條橋,早排已經有食肆用嚟包裝碗叉燒蛋飯去 sell,真係天下文章一大抄,唔係三次創作,而係 N次創作,其實咪又係菠蘿包夾住嚿叉燒同隻蛋,嗱,類似嘅嘢,跑馬地有間茶餐廳都有,叫特色菠蘿包餐,三十零蚊有得食,個菠蘿包夾沙爹牛又得,豬扒又得,乜「春」都得呀。

請問在座諸君,有冇需要照顧洋人市場,呢個「黯然銷魂漢堡」英文點譯呢?點樣向外國旅客介紹呢?真係笑死人咩,官方英文譯做「 BBQ Pork Burger」,咁譯法,又點叫旅客捉到「黯然銷魂漢堡」嘅神髓!

楊國佳

嗱,睇吓啲菠蘿包餐,乜款都有,有咩創意吖!

呢款「黯然銷魂漢堡」,英文譯做「 BBQ Pork Burger」,完全唔到位!

何必打外父工呢?

創科局局長飛鴿傳書,回應小宗上期《楊局長曾經滄海》,謂自己九九年把 Kaifa賣給 E-Tek後套現四億三,就離開外父間蜆売電器,公司之後投資與撇賬,豈能與他扯上關係,仲補充番自己履歷,如在 JDS Uniphase Corporation做副總裁,又在華平創投(亞洲)任高級顧問。咁叻仔,就唔好同外父打工

當年蜆売電器賣嘢套現賺錢就歸楊偉雄,撇賬輸錢,莫非要問其舅仔翁國基?

九八年,楊偉雄(藍圈)在其外父翁祐(紅圈)的蜆売電器打工,與舅仔翁國基(黃圈)一家人共事。

禮失求諸野

兩千幾年前,孔夫子慨嘆禮失求諸野;估唔到當今之世,搵電視藝人亦要遠走番邦,越洋去到加拿大。你睇,為咗《型•男家族》可以令觀眾耳目一新,無綫 620不惜御駕親征,帶同手下去溫哥華揀蟀。揀唔揀到,係未知之數,但就有機會見識當地僑領馮永發間大宅——同埋佢尊夫人嘅插花藝術矣。

四星伴月,正中為馮永發,左起依次為其尊夫人 Amy、余詠珊、 620及 Nancy Chieng。

馮永發的大宅在溫哥華 UBC附近,能遠眺海景。


鍾意就快D Share啦!