探熱針
馬明扭計未續約 陳展鵬硬搶做男一
《城寨英雄》有收視有口碑，是近年大台劇集難得一見！省到公司招牌，作為男一的陳展鵬，更是最大得益者。據知這劇監製文偉鴻九月會開拍新劇《同盟》，原本安排了馬國明擔任男主角，拍住過氣情人胡定欣，但因為拖住唔續約，加上《城寨》收得，馬明最終出局，換上陳展鵬；並加入一班《城寨》演員，希望食住個勢，再下一城。
用《城寨》班底
大台劇集，唔係冇人提，就俾人插爆！難得《城寨英雄》口碑收視雙贏，最高收視有三十一點，幫公司一洗污氣，該劇監製文偉鴻，亦是《使徒行者》電視版監製兼電影版導演，瞬間成為新一任金牌監製，大台小生花旦，爭住和他合作。
下個月，文偉鴻將會開拍新劇《同盟》，男主角一早定了馬國明，夥拍過氣女友胡定欣，但當陳展鵬知道文偉鴻開新劇，立即自薦，爭做男一。
「阿 Jazz（文偉鴻）同煎 Pang喺《城寨》合作得好開心，佢唔介意再用煎 Pang，不過之前度好係用馬明，所以佢心大心細；但煎 Pang好進取，成日𦧲住阿 Jazz，勸佢用番《城寨》班底。後來再同公司啲高層傾，最後決定飛起馬明。」一名幕後工作人員說。
擺明打壓
馬明出局，除了因為陳展鵬積極硬搶外，另一主因是明年便約滿大台的他，到目前仍未肯續約；鄭嘉穎同黃宗澤兩個一線小生將會排隊滿約離巢，大台唔可以再放走埋馬明，於是又出「雪藏屎橋」，諗住嚇窒馬明，逼他續約。
同時，大台亦刻意玩大細超。八月廿九日，陳展鵬的《巨輪 II》和馬明的《為食神探》同時出街，但公司只不斷在廣告時段谷《巨輪 II》，《為食神探》至今零宣傳。打壓馬明，擺到明！
撰文、攝影、攝錄：娛樂組
來源 source: http://hk.next.nextmedia.com
|
鍾意就快D Share啦！
|
|
|
