現年33歲嘅吳浩康(Deep)初出道時被師姐容祖兒賜封「靚仔版Eason」，唱過《先入為主》、《洗剪吹》、《擇日失戀》等好歌；但衰在個底花，14年演藝生涯中，有過藏毒案底、傷人、周街小便、使女人錢等等負面新聞，去年更被影到一個月內連(界刂)六女，搞到同鍾舒漫婚事泡湯。噚日阿Deep接受《蘋果》專訪，除咗承認有新歡外，仲講到佢過往發生過嘅事，佢就話：「即係咁，女仔就係人都會追，我敢講花心又唔止我一個，可能話緊我嘅人，其實又有幾多個冇試過吖....我唔係話我啱，我對我當時伴侶係好-對-唔-住。」2011年，有傳Deep因夾band再次沉迷藥物，令莊思敏忍痛分手，事後Deep喺微博留言話身邊人紛紛離佢而去，狀甚悽慘。Deep諗番都有啲眼紅紅，佢話﹕「我問自己，仲使唔使做人先？一係放(pair)，一係好好做，我選擇好好做，我都要面架，我都要出街，成日都諗，我條路未行完架，就算今日我60歲都未完。」Deep話真心有檢討過，尤其同莊思敏分手，令佢醒覺有啲嘢唔珍惜就會變質，佢話﹕「我有後悔，我對佢係好衰，我真係好衰，所以臨走佢做幾多傷害我都係啱嘅。(傷害乜？)唔講嘞，嗰堆新聞有幾多真幾多假都好，但我必須要檢討。」
| Deep話真心有檢討過，覺得傷害咗莊思敏。（攝影：陳志嵐） | | |
| | | |
來源 source: http://hk.apple.nextmedia.com
|
鍾意就快D Share啦！
|
|
|