武打男星伍允龍（Philip）與劉佩玥（Moon）去年拍攝熱播中的無綫劇集《城寨英雄》傳撻着，外間覺得他們合襯，但原來兩人第一次見面時連一句說話也沒有講過，劉佩玥更覺得男方又惡又Cool，沒有太多好感。後來他們全靠詠春入門式「小念頭」，一招將冰山劈開，迅速成為好朋友。伍允龍不諱言與劉佩玥拍攝三個半月朝夕相對，若非成為好朋友，或許喜歡上她，但他強調目前是好朋友關係，未有再進一步。
Mr.Cool 不打不相識
伍：伍允龍 劉：劉佩玥
劉佩玥與伍允龍名副其實不打不相識，由初次見面沒有太多好感，到迅速熟絡成為好朋友，全憑一招了！
劉：第一次見覺得你好Cool、好惡，戴住副太陽眼鏡，又掩住個鼻不停同助手講嘢，好似唔想同其他人傾偈咁，好似世外高人，第一日都冇同你講過嘢，哈哈。直到發生「小念頭」事件大家先開始玩、開始熟絡，原來第一次見面（嘅感覺）係唔準嘅。
伍：其實嗰日我係鼻敏感流緊鼻水，我拍咗好耐嘢，知道唔係每個演員都鍾意玩，所以都要揣摩吓你玩唔玩得先，唔可以一開始就咁放，慢慢熟悉好啲。
劉：我都有懷疑過你成日用呢啲招數嚟吸引女仔囉！
伍：我使乜用呢啲招數呢？就算用呢啲招數都吸引唔到女仔講起都想喊，嗚…
嗚…嗚…
點解唔敢望阿Moon？
劉：真係估唔到你咁多嘢講，多嘢講到有啲煩，又成日講笑話，但係又唔好笑喎！都唔知畀咩反應好，後來發覺唔畀反應係最好，你啲Gag太爛喇！
伍：我同袁偉豪已經成立咗個爛Gag小組圍讀第一日我都唔敢望阿Moon，其實唔係Cool，自己喺TVB嚟講係一個新人，唔想煩到人，大家誤解咗我Cool啫！直到記者會之後，我問你識唔識功夫，你就懶叻話自己識功夫，就叫你試嚟睇吓。
劉：呢個唔係事實，係你問我識唔識打，我話唔識。你話少少都識啩，我話識「小念頭」，你就叫我耍嚟睇吓，我耍第一招，你已經拍晒手掌喺度笑我話好犀利、厲害、厲害，好唔尊重人囉！
伍：因為呢一招，大家就打破咗隔膜，Ice Break，拍戲最緊要開心。
由朝見到晚 關係好Close
《城寨英雄》中，兩人由歡喜冤家到經歷同生共死，現實中他們拍攝時傳出撻着，被拍得撐枱腳，戀情傳到似層層！
劉：劇本寫得好，好有起承轉合，由歡喜冤家開始，一齊去經歷波瀾、生死，感情係慢慢積聚，唔使講出口大家都知我哋一對。
伍：拍劇同電影唔同，有好長時間可以鋪排，呢套劇嘅感情線好童話。有人會問拍戲會唔會投入咗落去，喺香港有拍拖戲就一定會傳緋聞。
劉：拍戲一定會投入咗個角色，要同對手有連繫先可以有嗰種感覺，如果冇交流，自己都唔信，觀眾又點可能信呢？
行慣「孖咇」 變得依賴
伍：我同阿Moon好快建立咗好Close嘅關係，開工三個半月由朝早見到夜晚，唔係做好朋友，就可能鍾意咗你，哈哈！因為你好爽、好大方，大家都玩得好開心。我又唔熟TVB呢，你帶住我周圍走，變咗好依賴，我中文又有限，好多詞語都唔識讀，大家就因為咁變成咗好Close嘅關係，連啲同事都誤解咗我哋，哈哈！
劉：秋姐（元秋）有次喺大班人面前問我，Philip去咗美國你咪會好傷心、好唔捨得囉？我話點解呢秋姐？秋姐話我哋拍緊拖㗎嘛！大家聽完喺度笑，好好笑、好開心，成套劇拍完大家到依家都係好好嘅朋友，呢種情感最緊要。
互相欣賞 勁啱Key
情侶或朋友，往往只差一步，劉佩玥與伍允龍會否跨過這一步呢？
伍：或者咁講，未來乜都有可能性，但係總之呢刻係好朋友。咁啱呢套做情侶啫！相信我哋認識到都一定會做到好朋友，因為你拍戲好認真、好專業，裏面唔係好多打戲，但係一拍動作戲就唔錫身，你睇吓整到成身損晒，我幾尊重呢個演員，尊重自然就會變成欣賞，你都好欣賞我嘅專業，因為咁大家做到好朋友，人哋點講、人哋點傳，我哋控制唔到。
劉：你講得好好，冇補充。
伍：我哋平時都會出嚟傾吓偈，講吓工作、講吓自己嘢，因為你讀電影，我又好熱愛電影，大家有好多共同話題好好傾，所以好快變咗朋友。
私事低調 唔使加鹽加醋
劉：同親男仔出去食飯就會傳緋聞，咩疑似拍拖，咁講對我、對我嘅朋友都唔公平，不過，我嘅性格比較積極、開朗，唔會畀呢啲嘢影響到大家嘅感情。其實食飯啫，唔使再喺啲餸上面加鹽加醋，啲餸夠味㗎喇！同埋我哋都傳到好悶，大家都唔會覺得係真！
伍：亞洲嘅文化好奇怪，男仔、女仔好似唔可以拍拖，拍拖就會變成話題。自己唔係為咗形象，只係覺得做演員已經乜都畀大家睇晒，喊到流晒鼻涕、畀人打到牙血都噴埋出嚟，某程度上希望生命某一部分係屬於私人，所以私人嘢唔會講太多，希望低調啲！
後記：大隻仔愛狗仔
訪問當日，見到劉佩玥抱住一隻可愛的約瑟爹利逗玩，原本以為是其愛犬，但傾談間才發現這隻嬌滴滴的小狗原來屬於伍允龍。一身肌肉的伍允龍抱起愛犬Emme，更顯得小狗十分的骰，大男人與的骰約瑟爹利構成有趣畫面。伍允龍原來一直鍾情細狗，尤其是來到香港，認為若果養大狗，缺乏活動空間讓牠走動，對牠不好；平日亦會看工作性質，若情況許可都會帶愛犬出街，盡量抽時間陪伴。
伍允龍
服裝：Scotch & soda
髮型：Calvin yuk@fifth
劉佩玥
化妝、髮型：Angela Shum
服裝：Kate spade
場地： HANBING Korean dessert cafe
|
鍾意就快D Share啦！
|
|
|