梁芷珊旗下嘅香港飛馬足球隊搵到新贊助商加盟，噚晚喺銅鑼灣HMV舉行派對，仲請到「火雞姐」丁可欣現身活動，火雞姐上台用高八度聲線話：「好funny㗎！近日拍咗片出街，冇諗過迴響咁大。」之前梁芷珊被周刊影到臉色忽變黑又暴瘦(新聞連結： http://bit.ly/2bMxwWE )，噚晚見佢依然消瘦，但化了妝掩蓋黝黑膚色。問芷珊會否增肥？佢話：「自己一直瘦，又鍾意運動，曬到好黑。」佢仲話9月初會送囡囡去英國讀寄宿學校，囡囡今年14歲過去讀書，芷珊話：「佢都好冷靜，佢唔縮沙我都唔縮沙，我做大人要冷靜啲。」此外，梁芷珊透露因為球隊獲得好多贊助，金額高達八位數，所以搞派對慶祝下。問到稍後有何發展大計？梁芷珊稱：「飛馬係比較新嘅球隊，得八年年資，最緊要比賽贏，今年特登請教練，對球隊寄予厚望，上季都有贏波。」咁球員有冇人工加？佢話：「合約制，唔同外國月薪制，加薪視乎球員個人表現。」同場嘅火雞姐接受媒訪問時就話，今日嚟支持本地有heart球隊，又坦言：「我其實好少睇波，但都支持飛馬球隊。」問到火雞姐出名之後係咪多咗活動邀請？佢話：「係呀，都會有㗎，o依家忙教跳舞暑期班，小朋友個個認到我，叫我火雞姐仲扮我話：『我好angry！』」問到有冇活動搵佢以火雞姐形象出席？佢話：「暫時唔會，想保留網上原汁原味感覺，啲片係經過變聲先講得咁快。如果有電影搵我拍都想嘗試，近年香港冇乜女新人咁潑辣又唔怕醜，個個都想做靚女，雖然我都鍾意靚，但都想嘗試下。」對於「奧運火雞姐」傅園慧爆紅，火雞姐話：「自己都睇好多佢嘅新聞，知佢嚟香港，好期待睇佢真人表情，但自己工作在身撞咗期未必去到。」
| 攝影：陳志嵐 | | |
| | | |
| | |
|
鍾意就快D Share啦！
|
|
|