90年亞姐亞軍施綺蓮、黃百鳴同楊玳詩等，今日喺灣仔出席雙喜樓開幕酒會，施綺蓮一身鮮紅色露背長裙現身，非常搶眼，而且保養得幾好，但係唔知係個妝嘅問題定係咩呢……點解好似唔似樣咁……講開施綺蓮嘅變化，佢02年同富商唐儀結婚，共育有兩女一子，前年施綺蓮丈夫又被指牽涉入一宗債務糾紛中，施綺蓮勞氣否認：「我哋近排先去完美國。今年1月過去美國接仔，我哋周圍全世界飛0架」去年兩公婆曾在半山屋企發生糾紛，施綺蓮更報警救助，婚姻關係成謎。數月前施綺蓮帶着三個仔女行ifc，全程廿四孝媽媽上身。今日再見番佢，佢話目前都好少幕前工作，主要搞商業，仲話最近以統籌身份攞咗英國國際學校Cothill House嘅牌照，依家搵緊地方，準備開兩、三間分校。問施綺蓮點解要辦學？佢話：「我覺得好有前途，我3個小朋友想入國際學校都好辛苦。」問佢對幕前係咪已經冇晒興趣？施綺蓮就話：「唔知係咪唔適合我，我offer唔到好嘢畀觀眾。之前林建名（大少）話興微電影，我冇真正考慮過，但係有適合嘅都冇乜所謂，我由頭到尾都唔叻演戲，如果真係拍要搵好多師傅先得。」
來源 source: http://hk.apple.nextmedia.com
|
鍾意就快D Share啦！
|
|
|
