「香港零售市道當然係好低迷，但已經差到無得再差！明年有望穩定番少少。」專售智能手機配件而聞名的肥仔開倉老闆肥仔說。他表示，由「佔中」開始，已感覺到香港經濟明顯轉差。而肥仔開倉自2014年4月開業至今，又豈只遇上一次風浪？「我哋之所以撐得住，係『唔衰得』嘅精神！」
肥仔開倉是由4位80後男生創立，過去2年幾，公司拼出條血路，不但逆境中生存，更由散貨場擴充多4間短、長租約租舖，分別在港九旺區，銅鑼灣及旺角開業。而今日適逢中秋佳節，公司在旺角荷李活購物中心再開1間地舖新店。
4位男生，都是電子銷售員出身，由同事轉做生意拍檔，共合資約40萬開設肥仔開倉。肥仔坦言，創業起步難，「其中一個拍檔原本用嚟結婚嘅錢都要拎埋出嚟，搞到要延遲婚期，同屋企人撐到行！所以真係唔衰得! 用着各兄弟辛辛苦苦賺嘅血汗錢，我哋惟有盡博一鋪。」
手足情深，故此關關難過關關過！肥仔憶述，「開業大半年，正值淡季，而市面又多人抄襲我哋，生意狂跌，收入少好多，拍檔個個諗節流方法，我仲話要加員工人工，非常非常冒險，但佢哋都肯。」結果，成功激勵員工士氣，更甘願為公司多出一分力。
4位老闆亦親力親為，分工合作負責市場調查、採購定價、入貨包裝、選購租務、擺位上貨、落場銷售等。「大家都攰到食飯都無胃口嘅時候，我哋同對方講得最多嘅說話係『呢度我搞掂，你返去休息先！得喇無問題！』」最終令生意穩步上揚。去年3月，公司生意額也穩定下來了。
靈活的銷售模式亦是其成功之道！肥仔以前打工曾到內地採購物資，得知在內地買手機配件到港售，就算定價比市面上的為低，仍有利可圖。故此開業初期，肥仔開倉以100元2件，100元3件作招徠，成功吸引客人蜂擁以至。
他更不諱言，「我初初會擺起個款，同客講，『買唔買，唔買放低。』而啲客會覺得呢度咁平，惟有受氣。」後來，他明白到，「人哋複製你嘅價錢，幾日就得；複製貨源，幾個月就得！」而肥仔及拍檔都預計到此割價方式，將引來不少競爭對手加入戰團，定必掀起一場你死我活的減價戰，所以他們率先改變平價速銷的策略，亦改變了待客態度。
提升客戶服務質素，建立良好的口碑及品牌形象，留住客人後，公司便提高貨品質量及價格，不再單以平價吸客，「依家入貨，我哋好注重品質，但若品質相若嘅話，我哋始終最平。」公司口號係「唔使去深水埗，唔洗上淘寶」，所標榜的就是售後服務及品質保證。
公司舖面員工對每件貨品之賣點瞭如指掌，能即時解答客人疑難，提供最好的產品推介。雖説公司對員工要求高，但他們均是體貼的老闆，當員工為朋友。肥仔從不擺架子，他謙稱，「自己無咩能力，同員工各施其職，講心嘅。就算公司做唔住，大家都仲係朋友。」只要做到收支平衡，都會選擇續租。「自己賺少啲，都要保住員工嘅飯碗。」
訪問中肥仔提及，「佔中」後香港零售市道轉差；市民消費意欲大減，「營業額由每日3萬幾蚊，跌到每日萬幾蚊。」但他抱有希望，在經濟不景時，仍覺會有某些生意做得好，「沙士時，賣口罩發到豬頭。《Pokémon GO》喺香港流行嘅第1個禮拜，我哋啲充電器都大賣！」。加上公司針對本地客源，經濟好壞對其生意影響有限。
肥仔開倉由最初租散貨場，到擴充至旺角及銅鑼灣共4間短、長租約租舖。問及目前公司盈利，他笑說，「搵到餐飯錢喇。」他透露，旺角中心分店月租約10萬元；信和中心的月租更達數十萬元。不過，他稱，舖租已較過往平逾20%至30%。
他並稱，會於明年內開拓自家品牌的手機配件，料每件產品將投資過10萬，更研究開拓網購及東南亞市場，以郵寄的方式送遞貨品。不過，他明言，身為土生土長的香港人，首要目標仍是做好香港生意。
肥仔開倉此店名，故名思義是以肥仔為生招牌。肥仔笑說，「以前有啲熟客過度嚟，習慣問，肥仔喺咪度到，如果我唔喺度，佢哋會下次先買。」他也沾沾自喜說，可能個人親民的形象討好客戶，所以其他老闆就決定，公司用他的「嘜頭」，「佢哋話啲客唔洗等我番舖頭，都知幫襯緊我。」
好奇一問，自家品牌會否印上肥仔的樣貌，肥仔說，「唔喇！」問及會否售賣手機以外的相關產品，他笑笑，「如果賣女仔嘢，可能會改名肥妹開倉。」
─ ─ ─ ─ ─ ─ ─
「致富智庫」領悟理財/職場智慧，一Click改變一世
http://money18.on.cc/wealth
「東網Money18」fb專頁：有討論、有分析，齊來FUN享，贏盡●你Like
http://www.facebook.com/money18
|
鍾意就快D Share啦！
|
|
|
