梁佩瑚日前喺有線節目爆當年選港姐黑幕，暗指同屆陳法蓉（Monica）疑違規為雜誌影相又扮委屈。沉默數日，陳法蓉日前(13號)終於爆seed，喺微博貼咗梁佩瑚爆選美黑幕嘅新聞短片，再貼文神回：「吃不到的葡萄是酸的。天下本無事，奈何多庸人自擾。唉…」句句落地有聲。事有湊巧，Monica好姊妹、同屬港姐出身嘅蔡少芬，同日於微博留言，聯手力抗梁佩瑚，寫道：「四個字－不知所謂！想當年，我拿季軍，我是從心笑出來！到現在，我還是哈…！知足常樂！」(新聞連結: http://bit.ly/2cFI3nk )同日就連洪欣都留言，話：「這種人，是活得太無聊，想借別人來宣傳自己吧。」即係咁，四位美女平時都謹言慎行，突然咁樣爆seed，其實好睇過馮盈盈爆粗，特別係當年曾與大劉劉鑾雄傳緋聞，當選後又搞咗個百萬生日派對嘅蔡少芬，佢寫呢句「不知所謂」、「我拿季軍，我是從心笑出來！」真係好爆囉。噚晚蔡少芬、古天樂、張智霖去咗旺角出席電影《S風暴》首映，問蔡少芬係咪好嬲？佢話：「唔係好嬲，嗰日我喺北京宣傳，瞓醒一開微博見到阿Mon咁講，覺得好不知所謂，唔使理，知足常樂。」蔡少芬話只係講自己感覺，「不知所謂」係對事唔係對人：「我嘅心態係開心就得，成件事好無奈，因為已經係20幾年前嘅嘢，都好奇怪，而且講出嚟冇意思，好似今日有人問我有冇睇香港小姐，其實都冇所謂，都唔緊要，最緊要唔好傷害人，因為講出嚟都冇乜意思，我都係想錫番阿Mon同支持佢。」問到會唔會了解真相？蔡少芬坦言：「唔會特別問。」咁識唔識梁佩瑚？佢話：「當然見過面，不過唔熟，大家都係藝人會識，不過冇機會認識，香港都有好多明星㗎嘛。」
|
鍾意就快D Share啦！
|
|
|
