「型佬」呢種生物大部分時間都喺電視入面生活，就好似喺螢幕入面做開大俠又或者係「型警」嘅三哥苗僑偉，雖然佢已經五十有八，仲有2年就登「六」，但係對佢嚟講都唔係問題，次次出嚟都係一貫chok到爆，絕對係「型佬」入面嘅表表者。原來「型佬」唔只剩係喺電視上睇到，佢哋仲會跳出框框喺現實見到佢，仲要同電視入面一模一樣！就好似讀者李小姐咁，噚日佢透過「爆相爆片」，分享喺南生圍親眼「捕獲」到三哥，嗰陣三哥喺度指揮交通。冇錯！係平時做開「型警」嘅三哥指揮交通，同睇電視一樣呀！話說南生圍呢個郊遊勝地，每到假日都好熱鬧，但係路面偏偏勁窄，成日都出現交通擠塞，秩序一片混亂！而噚日雙十節李小姐一家大細揸車去南生圍郊遊，因為嗰度係單程路，加上兩邊嘅行人路又有唔少路人，可以想像到情況有幾混亂。李小姐話冇耐見到一個著住白色T恤兼戴住黑超嘅男人，逐架車叫佢哋慢僈後退，當時佢都冇為意，直到佢老公話呢個係三哥苗僑偉嘅時候，佢真係好愕然。片中李小姐與同車男士當時對話如下：男：喂，苗僑偉喎！
女：邊度呀？
男：苗僑偉呀！
女：真係㗎！？好有型呀三哥！女嗰個，應該就係李小姐喇。冷靜番嘅李小姐接受《蘋果》電話訪問時話：「我開頭都唔信，之後佢行近見到呢個真係三哥，佢嘅身型真係好fit，把聲仲好溫柔，嗰陣因為有車出唔到嚟，佢就每架車幫手叫我哋退後，可能冇諗過會喺呢個情況下見到佢，所以大家都慢慢退後。」查實唔止司機愕然，連啲路人都忍唔住向後望！至於搞咗幾耐先啲車先退晒？李小姐話：「我諗有10分鐘到，我架車後尾泊左埋一邊，就冇再睇到佢行咗幾遠。」
|
鍾意就快D Share啦！
|
|
|