同場着露肩裙騷香肩嘅唐詩詠，被問到馬國明話唔介意同佢及洪永城三人行搵錢，唐詩詠笑住話：「吓，我要諗吓先，唔制，咁佢咪好着數。」係咪留番畀男友情侶檔？佢話：「我要佢分番啲佣畀我先，其實都冇所謂，我驚變第三者，依家啲新聞都係佢兩個。」講到日前洪永城同傅嘉莉拍親熱戲，唐詩詠有啲詐型話：「我覺得尺度ok，但男友鍾意畀驚喜我，大家明白工作，但有時講聲好啲囉。」似乎唔滿意男友事前冇備案噃。至於佘詩曼最近喺大陸真人騷做廚神，佢坦言：「參加真人騷獲益良多，好多朋友約食飯要我親手煮，佢哋唔相信我嘅手勢，自己都好唔忿氣，已經煮咗四、五餐，我要令佢哋心服口服，終於明白煮完好攰唔想食感覺，感受到以前媽咪點解會咁樣。」問到會唔會做教煮餸節目？阿佘話：「我未有咁叻，要同媽咪進修吓先夠膽。近期有個關於裝修屋企真人騷搵我，考慮私隱問題應該唔會接，如果接證明抵抗唔到金錢誘惑。」另外講到佢之前出席楊怡同羅仲謙婚宴，結果醉到貓晒腳步浮浮走，阿佘自嘲：「嗰日冇醉，只係不勝酒力，我係半步釘，飲半杯啤酒已經面紅，紅都面晒。」
來源 source: http://s.nextmedia.com
|
鍾意就快D Share啦！
|
|
|
