早幾日開箱男去咗PS VR試玩大會，見到Model Mandy試《DRIVECLUB VR》玩得咁過癮，又話眼罩戴得算舒適，心郁郁即場問官方借番一套，開箱同各位東網生活讀者見真章！
仲以為PS VR成套得個眼罩以及攝影鏡頭，包裝盒應該好的骰至係，但原來仲大盒過一部PS4，拎起都真係幾墜手。今次開箱男借呢套係Full Gear套裝，即係有齊PlayStation VR眼罩、處理器盒子、PlayStation Camera以及2支PlayStation Move動態控制器。其實打開盒仲有一大堆線材，轉頭再教大家點駁機。
當中PlayStation Camera係新版本，鏡頭以圓柱體設計，可懸掛於調節支架上。至於配戴PlayStation VR時，記得先按住底部圓鍵將眼罩趟出，再按實背部並拉出頭帶，才有空間套入頭部。而連接眼罩和主機的處理器盒子，後面用來駁HDMI和火牛，右側趟動設計前端連接眼罩。
到「開壇」組裝PS VR，只需按照說明書步驟，跟足已標記數字的線材順序插好，基本上5分鐘即可完成。簡單講就是將本來直接連結的PS4和電視的一組HDMI端子，變成分接到處理器盒子，而VR眼罩的HDMI和AUX雙插頭，則連接到處理器盒子。只係駁完機線材一大堆，大家要諗計整理一下喇。
玩PS VR毋須劇烈動作，安坐沙發即可。前提是僅需要騰出一個長3米、寬1.9米的遊玩空間，然後讓攝影鏡頭設置於跟玩家視點同一水平，能正面感測玩家的臉孔便OK，玩家亦可按手掣Home鍵重新調校位置。
實際試過玩《DRIVECLUB VR》，模擬車廂內駕駛感覺的確幾逼真，轉向時的方向感，甚至連炒車都疑幻似真，可惜眼罩內遊戲畫面解析度不算細緻。至於換成玩非VR遊戲時，畫面會自動設定成163吋，可以自私打機，同樣除了解析度不足外，整體感覺都算唔錯。
|
鍾意就快D Share啦！
|
|
|