身材堅挺，袁嘉敏指個胸型係天生！又話阿媽同樣係大胸細腰。
娛頭
移花接木屈拍網片 俾人叫去接客 袁嘉敏：大胸唔代表係妓女！
一脫成名的袁嘉敏，唔介意賣性感，甚或成為男人幻想對象，不過，對近日有被指是她的激情慾照流出，她反應極大。「個女人唔係我！胸大唔代表要做妓女，做不道德嘅嘢！要做十年前已經做咗，使乜入行做演員，每星期拖個喼返內地做嘢咁辛苦！」胸大腰幼，天生有本錢的袁嘉敏自訂底線，屈佢辱佢，勢係假！
無法無天
拍完《鴨王》後，這兩年袁嘉敏密返內地登台，大小通吃。早前，她接拍了一部內地網絡電影，但事後卻有批直指是袁嘉敏的激情慾照流出，激到她扎扎跳，要搵律師追究。
「我只係拍咗一日戲，合約都寫明唔會拍大膽場面！我完全唔知有呢啲色情戲，佢哋搵個女人拍完就話係我！真係無法無天！
「如果個女人做得唔好，睇咗嘅人會以為真係我，會話連床戲都唔好搵袁嘉敏拍！佢做得好硬，我好無辜，點解我要承擔呢啲責任！對我好唔公平！」袁嘉敏不忿說。
同網民鬧交
令袁嘉敏更加困擾的，還包括經常被網民惡搞，將貌似她的女人床照 po上網，指她做不道德交易。
「已經試過六、七次，將啲有把長曲髮嘅女人就話係我，網上啲人成日話我有做不道德交易，連我助手都好嬲，試過為咗我同網民鬧交，因為佢個個星期同我拖住個篋返內地跑，知我好辛苦，助手幫咗我一年，已經老咗好多，成頭白髮。
「我每收一筆錢，都係正正常常，點解個胸大啲，就要做不道德嘅嘢！胸大唔代表係妓女，如果我要做，十年前已經做咗，唔使咁辛苦！」袁嘉敏愈講愈㷫。
不停被問價
天生有本錢，即使袁嘉敏劃出界線，堅持不逾半步，但至今仍被不停問價。
「出去睇得多，我都見過一啲真係做妓女嘅！其實好容易知道，佢哋全身名牌，加埋隨時三、四十萬，普通一份人工唔會搵到！啲女仔唔使做嘢，成日周遊列國，住頂級酒店，去最貴地方；我做演員，出嚟都係 T恤牛仔褲！」
至今仍不停被問價，袁嘉敏都毫無興趣！
袁嘉敏說，就算自己一再表明對「賺快錢」冇興趣，但那些所謂中間人，仍對她咬住唔放。
「係好纏擾！啲人最初係扮傾 job，之後會話你明嘅，你明嘅！我話我唔明，我做嘢一定要白紙黑字簽合約，一定唔會唔簽合約，就同助手上去（返內地）！一講到要簽約，佢哋就會話唔方便，話到時我上到去，就會有人嚟接我！
「呢個社會變得好歪曲，點解一定要賺快錢？成身名牌，我唔覺呢啲係幸福！」
阿媽大胸腰幼
賺每一蚊返嚟都見得光的袁嘉敏，堅挺 D奶同樣令她感到自豪。
「我唔鍾意托，胸圍都係冇墊嘅！我阿媽同我一樣，都係大胸，細腰大 pat pat，所以你見我去首映，從來唔會同阿媽出嚟，因為個畫面會好好笑！啲人一定會講佢個胸！」
有身材唔好嘥，稍後袁嘉敏打算出網上寫真。
「我拍嘅電影、電視劇都要我扮醜，《鴨王》要扮大年紀嘅怨婦，之前拍咗一部內地電影，又係扮村姑，連粉底都要搽深色嘅！所以真係好想影輯靚相，俾人睇到自己自然靚一面！」
《鴨王》之後，陸續有不少片商搵袁嘉敏再剝，但她對再拍三級片，態度非常謹慎。
「可能拍《鴨王》經歷唔係咁開心，試造型喊，開工第一日又喊，再拍呢類戲都要傾清楚！之前都有一部戲想我裸露同講粗口，係笑片嚟，但我覺得無乜需要，如果純粹要觀眾得啖笑，點解我要剝衫呢，太有為而為啦。」袁嘉敏說。
身材累事
擁有 34D驕人身材的袁嘉敏，經常被傳以不道德交易賺錢，就連電影公司，亦要移花接木，借袁嘉敏的 body做宣傳，屈得就屈，令她十分困擾。
誤導宣傳
於內地網絡電影《深夜咖啡館之失踪少女》中，客串飾演公司小職員的袁嘉敏，要以性感 look打扮色誘拍檔「細龜」黃一山，豈料袁嘉敏卻被電影公司擺上枱，將片中一場性愛場口的女角當成袁嘉敏，刻意造假誤導。
撰文、攝影、攝錄：娛樂組
|
鍾意就快D Share啦！
|
|
|
