拍廣告回歸 無悔演三級片 鍾淑慧：我寶刀未老
現年47歲的鍾淑慧，近日因老公吳岱融人氣升而帶挈她復出拍廣告。日前鍾淑慧為廣告進行拍攝，雖然退隱娛樂圈十一年，但她笑言自己寶刀未老，拍攝過程十分順利。對於90年代與吳岱融接拍過多部三級片，鍾淑慧坦言從未言悔：「又唔係賣弄，對我哋嚟講，係一個好大嘅挑戰，覺得唔係乜嘢嘅一回事。」
■現年47歲的鍾淑慧日前為護膚品牌拍廣告，退隱十一年的她笑言自己寶刀未老。
吳岱融近日憑《巨輪II》人氣翻生，令退隱娛樂圈十一年的太太鍾淑慧妻憑夫貴，獲馬來西亞護膚品牌力邀她做代言人。日前鍾淑慧在馬來西亞接拍廣告，退隱多年的她未因此生疏，她前日在電話中說：「嗰日係1點開始影，影到夜晚7點，有拍video同影相，喺咁短時間做咗咁多嘢，都好順利。相信我都寶刀未老，全部係喺三take以內搞掂晒，始終要配合燈光同埋其他問題，不過係好順利拍晒，我除咗嫌自己有啲略肥，so far都滿意。」
婚姻曾亮紅燈90年代鍾淑慧與吳岱融以情侶檔姿態一起拍攝《滅門慘案之孽殺》、《替天行道之殺兄》和《弱殺》三部三級片，由於吳岱融近日在《巨輪II》姦出位，激發網民喪煲他與太太拍過的三級片。問鍾淑慧可曾後悔拍三級片？她說：「其實又冇囉，當年我都有份參與呢個劇本，有共識點樣去拍，而且我哋嗰幾部戲嘅題材都係真人真事，當然要加入啲電影元素，真係唔少得。作為一個演員，我覺得又唔係賣弄，而且喺嗰個時間，對我哋嚟講，又係一個好大嘅挑戰，變咗覺得唔係乜嘢嘅一回事，事實上喺外國嚟講，某啲位都係合情合理，都係好正常，我自己係喺絕對接受嘅情況下接拍，所以唔可以話有乜嘢後悔唔後悔，呢啲嘢係自己去決定，對演員嚟講係一個經歷。」
鍾淑慧與吳岱融於95年11月28日在新加坡註冊結婚，翌年2月14日返港擺喜酒，這段快將二十一年的婚姻，並非一帆風順，當年有傳吳岱融因事業陷於低潮而終日借酒澆愁，喪蒲喪玩，二人婚姻亮紅燈，幸得鍾淑慧不離不棄努力登台接騷撐起頭家。對此鍾淑慧未有多講，但就默認婚姻曾出現問題，她說：「我相信一對夫妻邊度會冇磨擦，喺婚姻過程梗會有啲，我哋結咗婚都二十幾年，一定會有磨擦同唔開心，過咗去就冇嘢，唔需要再提。」
■吳岱融與鍾淑慧90年代以情侶檔拍三級片《替天行道之殺兄》。劇照
■鍾淑慧與吳岱融月底慶祝結婚二十一年，兒子吳政樺現已19歲。微博圖片
【94年】■鍾淑慧坦言未有後悔當年接拍三級片。資料圖片
■復出拍廣告的鍾淑慧駕輕就熟，僅花六小時便完成拍攝。
避提獨力養家提到當年獨力撐起頭家傳聞，鍾淑慧說：「𠵱家呢個年代都冇話邊個撐起頭家，亦都冇話男主外、女主內，甚至係男主內、女主外都冇乜所謂，大家一家人都唔會計劃呢啲嘢，邊個OK咪邊個上囉。呢啲嘢其實好似打波，邊個體力OK，咪打住上半場先，邊個想唞嘅，咪打住下半場先囉，甚至乎大家都OK嘅，咪打住雙打先囉，一齊去拼搏，唔可以獨力去做。我𠵱家日日都喺度暢泳、行街同休息，佢日日都做到好辛苦，病住都要開工，呢啲又點計呢？」
採訪：魯吉
|
鍾意就快D Share啦！
|
|
|
