熱爆娛樂: 滙控舵手「肥雞餐」露玄機 [壹週刊 - 1397

2016年12月15日星期四

滙控舵手「肥雞餐」露玄機 [壹週刊 - 1397 - 財經] __,M1,

滙控行政總裁歐智華炒房出身，過去的花紅及薪酬高過主席；如他要請辭需有十二個月通知期。

中環人語

滙控舵手「肥雞餐」露玄機

本週一，屹立在滙豐總行的「風水米」，喺聖誕前獲專人去擦到立立令；久違了的「聖誕鐘，買滙豐」在今年響起；「揸鑊鏟」出身的行政總裁歐智華，眾所周知佢最多坐到二○一八年，時間無多之下，梗有動力谷起滙豐股價。

歐智華去年雖然被減薪，但集團有五花八門獎勵計劃推動員工士氣，透過「業績表現股份計劃」及「 2011有限制股份計劃」，歐智華截至今年六月底已獲六十萬股滙豐股份，以每股六十五元計，近四千萬港元；如果有幸唔使提早起身，坐到二○一八年，仲有一百三十多萬股滙豐落袋，市值八千多萬。滙豐花紅薪酬委員會都唔笨，歐智華炒房出身，恐防揸住自己股票睇位炒上炒落唔得專注本業，所以歐智華手中呢堆股份有禁售規定，起咗身先賣得，以此推敲歐智華在餘下任期又點會唔想盡辦法谷起個股價，自從滙控八月宣布以廿五億美元回購股份，股價升咗兩成多，唔少大行分析明年會加碼回購，滙豐股東就有運行。

不過歐智華另一筆「肥雞」要睇特朗普，這筆股份共 92,185股，市值近六百萬，是三年前授出予歐智華，能否袋袋平安，要視乎滙控能否與美國司法部拆掂數，呢鋪要睇特朗普上場後，會否放寬銀行業監管，叫停司法部對滙控指控。

去年滙豐一百五十周年，在御用風水師龍景銓的布局下，添置了一個米形藝術裝置。本週一、二，有專人替這粒「米」省得立立令。

中環私家煲煙巷

中環聖佐治大廈旁，有條「煲煙巷」，食晏時間及放工前都有唔少煙民在此抖吓氣，其實煙民要多得嘉道理家族慷慨，讓這條私家巷俾打工仔煲吓煙、減吓壓，這條煲煙巷實屬其家族擁有的聖佐治大廈業權範圍之內，其實煙民踩住嘅地下，是遮打爵士於一八八七年提出中環海旁填海計劃得來的中環第一期填海地，一九○四年由置地在此興建聖佐治行，一九二八年再由嘉道理家族向置地購入，後來在一九六五年拆卸重建，持有此地皮逾八十八年，儘管不少紅色資金殺入香港掃商廈，米高嘉道理早前在其半島酒店一百五十周年慶典中，明言對香港有深厚感情，不會出售資產，對煙民來說是一大喜訊。況且這幢商廈是米高嘉道理的生日禮物，有紀念價值，又點會轉售他人？

這條私家煲煙巷成為不少中環人的減壓區。

聖佐治行（中）由置地發展興建，遮打爵士特別以英國皇室稱號命名，即使嘉道理家族也沿用名稱至今。

中環寸嘴　炒出彩虹

楊國佳：嚿叉燒成寸厚。

工廈大王楊耀松長子，八十年代往北美洲開山劈石，做一帶一路先頭部隊，自比為星仔變星爺前冇人懂欣賞其無厘頭文化，廿年後終於領略當中奧妙，與粉絲分享在北美洲各路人士交手經歷，絕不老點。

喺旺角豉油街開咗間希爾頓花園酒店，英文名都恰如其名叫 Hilton Garden Inn，同隔籬登打士街大鴻輝間 Holiday Inn Express都好 in，大家 Inn對 Inn，不過 Hilton Garden Inn勝在有間中式食肆「鷹巢」，一去到我即叫碟炒飯睇吓個廚功架，話你知，舊式廚房佬去見工，唔似得而家咁必須有張沙紙，見工時要去炒個飯，個廚要喺陌生環境，好似獵狗咁敏銳，在有限資源下，加上本身功架，炒到有聲有色，呢啲叫做炒飯都要炒出彩虹。「鷹巢」呢度個炒飯，叫做「不過不失」。

其實「鷹巢」以前係希爾頓酒店（現為長江中心）入面西餐廳，嗰時中環冇乜酒店， Hilton同 Mandarin齊名，仔時老豆帶我去得多，嗰時葉麗儀喺度駐場唱歌，我有啲同學仔係 Hilton VIP會員，仲有個 health club可以游水，酒店下面地庫仲有間叫「 Cat Street」的 coffee shop；喺「鷹巢」叫杯咖啡或奶茶，正宗的一定有 Petit four餅仔跟尾，老豆仲同我講：「傻仔，咁就唔使叫甜品，慳番啲甜品錢。」如果係有魅力或者係熟客，就 Petit four變 Petit twelve都得！