作勢跳車，鏡頭前的馬明同胡鴻鈞好合拍。
娛樂偵訊
馬明陪胡鴻鈞 冒雨跳車
終於肯續約，可以離開大雪櫃的馬國明，正為新劇《降魔的》埋尾。日前，劇組於汀九一個停車場開夜班，就算全晚落唔停雨，都要照拍！當晚馬明同胡鴻鈞要拍跳車戲，有踢波習慣的馬明身手無須懷疑，但沒想到初哥胡鴻鈞都有番咁上下，原本預拍 3小時，最終個半鐘搞掂。不過，每次一停機，馬明都自動彈開發呆，如果換轉對手是其他姐仔，相信會生猛好多！
新丁一點就明
開工先嚟落雨！在汀九海旁停車場拍外景，全晚食住風又落雨，好攞命！
晚上九時，工作人員將用以拍攝的的士車尾吊起並在下面鋪滿地墊後，導演和劇組人員淋住雨同馬明、胡鴻鈞先講解清楚拍攝的要求，兩個演員才預備埋位。
由於胡鴻鈞拍劇經驗不多，要做戲又要兼顧動作場面，劇組人員預計這個場口需要花上三小時，沒料到最終只拍了六 take，導演便收貨，個半小時便可以轉景！「 Hubert仔（胡鴻鈞）咁新，班手足（幕後）初時估計場戲三個鐘都未必拍得晒，但估唔到 Hubert仔斯斯文文，身手都幾好。可能後生啦，一點就明！」劇組人員說。
胡鴻鈞唔甩轆，對手馬明雖然不用陪 NG，但全晚有一大堆打鬥場面等住他上陣，所以每次一拍完停機，馬明便自動彈開，除偶然同幕後吹水，其餘時間，都呆呆吽吽冇乜表情。
咬完手指掂 fans
幾日後，一身街坊 look的馬明現身土瓜灣開工，幕後工作人員擺機位時，男主角有公司冷氣車唔坐，寧願企街同導演研究劇本，最終惹來不少「阿豬媽」粉絲留意，上前求合照，順得人馬明完全無托手踭任影，還主動搭膊，之不過，那隻搭粉絲膊頭的手，正是他之前咬得津津有味的，好滋味！
當初馬明死拖唔肯落筆續約，大台於是以《為食神探》收視口碑欠佳為由，抽起他及周麗淇擔正的重頭劇《流氓皇帝》，直至九月馬明落實留低，《流氓》才有機會於本週出街，重見天日。
撰文、攝影、攝錄：娛樂組
來源 source: http://hk.next.nextmedia.com
|
鍾意就快D Share啦！
|
|
|
