蘇永康表示背祖忘宗分裂國家係唔做得㗎。
探熱針
被封殺兩年 蘇永康擦強國 插「梁、游」
蘇永康 49歲老來得子，可能因此高興過頭，竟然公開講：「我唔想生一個梁天恆（梁頌恆加梁天恆），唔想生一個游蕙禎。」事件引起很大回響，結果，連他當年在台灣吸毒被捕事件，都被舊事重提。
據知，蘇永康在 14年 9月因為發表過一番支持佔中言論而被列入「嚴控類」，自此被大陸封殺，只要有他份演出活動，一律不獲審批；整整兩年冇機會賺人仔，收入大減！即將要養多件化骨龍，蘇永康不得不變身成為「愛國藝人」，搏大陸解封。
公開撐佔中
一四年，蘇永康公開撐佔中人士，並炮轟當時的警務處處長曾偉雄。「佢哋（佔中人士）唔係八十年代暴徒，唔係掟燃燒彈，警務處處長要解釋，知道警方係因為阿頭叫咁做，佢哋都冇得唔做，香港人嚇香港人做乜？裝備及橫額（「速離否則開槍」旗幟）呢啲嘢令香港人不滿。」
因為這番言論，令蘇永康被內地有關方面列入「嚴控類」，其時，名單中還有同樣發表過支持佔中言論的張敬軒、林夕、何韻詩、杜汶澤及黃秋生等香港藝人；自此，有他們份參與的影視、音樂及演出，一律都要經過嚴格審批，但大多數都不會獲批准。
連累埋拍檔
以往不時到強國賺人仔的蘇永康，近兩年在大陸演出次數少之又少，原本與任賢齊、梁漢文及黃家強組成的「男人幫」，亦因為蘇永康無法取得大陸巡唱批文，最後只做了香港、澳門及馬來西亞雲頂幾站。
「其實之前都試過有啲大陸雜錦 show，因為有蘇永康個名，所以攞唔到批文，但只要一剔走佢個名，又即刻搞掂；所以都有人建議過『男人幫』開騷，大陸站唔用蘇永康，不過佢哋公司（寰亞）唔肯咁做。」知情人說。
被翻吸毒舊史
冇機會返大陸吸金，在港甚少工作的蘇永康，惟有展示愛國愛黨一面，借唔想生個仔女似「梁、游」，對大陸表明他不支持港獨。
呢招是否可以幫到蘇永康解禁其實無人能夠保證，不過此舉未見其利，先見其害！包括他○二年，在台灣吸毒被捕新聞，亦再被網民重溫，甚至以其人之道，還治其人之身，聲言也不希望生個仔，似蘇永康走去吸毒。
撰文、攝影、攝錄：娛樂組
|
鍾意就快D Share啦！
|
|
|
