現年37歲的無綫藝人崔建邦（Amigo）一月中會參加一個大型拳賽，其實Amigo 18歲開始便打西洋拳，更參加過多場業餘比賽，不過當他22歲時，便沒有繼續再打，之前他打拳都只是晚上練習，現時快要正式埋牙比賽，他每日都以多個小時操練，不過最難熬的並不是操練的過程，而家操練換來的「周身傷」，難怪縱然Amigo多次打拳賽，其父母都沒有到場支持，就算今次開到口邀父母前來撐場，父母都拒絕，都是不想看到兒子受皮肉之苦。
高峰重160磅
之前眼見Amigo都心廣體胖，最高峰期更達160磅，不過自四月開始操練後，現時已足足減了廿磅，問他為何突然又想打拳時，他坦言：「其實一直個心都有個希望，以前冇乜點盡力，而家年紀開始大，機器開始壞，想完成呢個夢想，(之前肥好多！)嗰個階段食嘢又冇乜節制，運動都好少，一個星期最多打一次籃球，所以四月開始操練時都好辛苦，用咗兩個月時間先至適應、習慣到做運動，仲未計pick up番打拳姿勢，而家練到六成，體能上面都可以應付到。」Amigo下星期便會出發到菲律賓，於當地跟拳王訓練三個多星期，他坦言：「以前我打拳冇咁嘅配套，而家每日操練就好似返學咁，呢度好似一間學校，每日我都會嚟，跑步一個鐘，練拳兩個鐘頭，之後菲律賓都會地獄式訓練，一日要操三堂，操足三個多星期。」
就「四條」朋友擔心唔襟打
Amigo現時與林珊珊女兒李怡（野人）拍拖，問到女友是否都同樣支持他參賽時，他笑謂：「身邊好多朋友知我打比賽都好擔心，擔心我都就快『四條』，仲得唔得。（你哋關係如何？）大家都相處咗一段日子，幾好，（有冇壓力？）我只係對比賽有壓力，晚晚都瞓唔着，諗緊點樣反擊，真係好緊張，我目標係上台打一場精彩嘅比賽。（女朋友緊張受傷？）我阿媽、阿爸緊張啲，以前佢哋唔會嚟睇，驚見到我受傷，佢哋今次都話唔會睇，（女友呢？）唔知喎！不過身邊好多朋友都話好想睇！」不過，Amigo坦言現時最大的困擾不是練拳，而是傷痛，他謂：「真係好辛苦，之前練習，腰、左右手腕、胸肌都拉傷晒，又痛又唔可以停訓練，呢個係最折磨。」
說到事業，之前Amigo曾於無綫做助理編導（PA），由低做起，他坦言那時都曾經歷經濟有困難的日子，更曾試過要用錢而將八達通的數十元按金都退來用頂住，不過這都過去，而Amigo亦坦言很多謝身邊好友，好似林國斌，他坦言：「好多謝佢，一直支持我，令我可以做番一個積極嘅人。」
場地提供:FFG武術健身中心
|
鍾意就快D Share啦！
|
|
|