服務無綫42年最大壓力志雲涉貪 曾醒明：好多嘢係硬食
經歷楊思琦未婚產女、港姐普選死機及馬賽艷照等風波，無綫前企業傳訊部宣傳科副總監曾醒明，過去四十二年為無綫大小事務拆彈，最終「被退休」收場。回復自由人身份的曾醒明昨日接受本報專訪，直指處理陳志雲涉貪事件承受精神壓力最大，儘管工作一腳踢，曾醒明也從不介懷：「好多嘢我哋都係硬食㗎。」他更大讚黎明處理危機是絕佳公關教材。
■為無綫拆足42年彈的曾醒明去年被退休，他昨坦言曾一度感失落和受打擊。攝影：葉君海
【志雲被起訴】■直屬上司陳志雲2010年涉貪事件，曾醒明指是公關生涯中最大精神壓力一次。資料圖片
【接思琦返港】■楊思琦（左）早年未婚產女返港後，曾醒明與樂易玲到機場接機，並安排她跟傳媒見面。資料圖片
現年64歲的無綫前企業傳訊部宣傳科副總監曾醒明，在無綫由初級公關助理做起，42年來為無綫、藝人化解過無數危機，是傳媒公認的真正第一公關。可惜，為無綫仆心仆命多年，滿以為可以做到今年無綫50周年台慶，結果曾醒明去年「被退休」，並由去年6月轉職為顧問至上月底正式離職。
■91年黎明與郭富城為港姐到瑞士拍外景，曾醒明全程照顧傳媒。
被標籤冇得升回復自由身的曾醒明昨日接受本報專訪時，問到被退休會否感到失落和很大打擊，他說：「初初接到消息，係有咁樣嘅感覺，但諗落我又唔係咁大失落感。你話我仆心仆命，我係同意，我同呢間公司一齊成長，最輝煌嘅時候，我哋分享過，今日就算話『人哋都唔要你』對我嚟講，我真係有賺。」有指他是志雲黨所以沒機會升職及被退休，曾醒明說：「我係無綫黨，對任何一個同事我都係坦誠，做好本份，唔係屬於邊一派邊一黨。最緊要工作開心，title對我嚟講唔係咁緊要。」
多年來的公關事件，曾醒明最深刻印象是2010年上司陳志雲的涉貪風波，他說：「每晚返到屋企仲有好多傳媒電話打嚟，個個都想我親自覆佢哋，講到口都攰埋，精神壓力好大，同埋你要有個平衡，第一，我要執行公司安排，公司好清楚話要同廉署合作，另一方面陳志雲係我直屬上司，你喺夾縫之中要確保公司立場，亦唔想傷害到自己同事，同埋傳媒不斷要你提供消息，我底線係首先一定喺公司立場為依歸，你一定要拿揑得好好，加上封城事件，對我好大衝擊。」曾醒明表示幸得傳媒支持鼓勵，令他尤為感激，而他紓緩壓力的方法是做義工參與「送炭到泰北」等慈善工作。
黎明公關教材不少人認為曾醒明是TVBuddy及拆彈專家，曾醒明卻自嘲其實是跑腿，他說：「人哋唔處理嘅問題都掟晒嚟：『有啲乜嘢搵外事部』所以我覺得我哋係打雜，我覺得冇問題，只要為咗公司形象，點去做我都唔介懷，好多嘢我哋都係硬食㗎。」說到做公關心得，曾醒明認為要面面俱圓，他說：「無論做人做事，你係真誠待人，你自然贏得人哋真心，千祈唔好嫌做得多，要多走兩步。」就正如去年黎明（Leon）處理演唱會公關手法，曾醒明最為欣賞，他說：「我覺得Leon嗰單嘢處理得好好，亦都係好好教材，任何公關災難，第一盡速處理，第二唔好迴避，第三係要積極面對，一迴避，無形中件事就會發酵，一發酵就可能會去到一個不可收拾嘅地步。」
採訪：戴彩煥
|
鍾意就快D Share啦！
|
|
|