「索苟」變「XX」的過程，當事人在訪問中都冇講，總之就係同郭富城傳緋聞之後。當時城城同熊黛林仲拍緊拖，兩女分兩日去紅館睇城城個唱，花生一地都係。最後熊黛林憑著與城城「世紀一握」確認名份。可惜熊黛林同城城最後都係分手。但分手之前，苟姑娘已經因為外界壓力，患上甲狀腺失調及抑鬱症，體重暴升，更多了個花名叫「肥苟」。傳聞苟姑娘當年是為城城不開心，她稱：「我就唔怪任何人嘅，係自己睇唔開，或者諗唔明，但呢啲係生命中發生嘅事，係好好經歷，令我會令自己更加懂得處理自己心態。」由昔日與城城，到今日的富二代陸漢洋，苟姑娘屢被傳是第三者。對此，苟姑娘鄭重澄清：「我可以好光明正大、好大聲咁話，我冇做過第三者，冇對人唔住。」挾選美冠軍之名簽無綫，苟姑娘都話，嗰陣太受保護，很多事情都不懂處理，而人生轉捩點，就在此時發生：「嗰陣時唔知發生乜嘢事，跌咗落去，其實係一個幾寶貴人生經歷……」咁點解覺得自己跌咗落去？苟姑娘話:「因為可能自己都唔係好知發生咩事……喺加拿大成長背景比較簡單，香港就比較快比較複雜。」最後歸咎於自己處於呢方面問題經驗不足……傻妹，冇必要樣樣怪自己。雖然苟姑娘中文麻麻，唔係太識得睇網民負評或報道，但佢朋友識。就係因為太關心佢、驚佢受傷丈害，所以每見有失實報道或不利留言，都會講番俾苟姑娘知，結果因此令她壓力倍增。「唔係事實，唔係真嘅嘢而俾人講，心裡面覺得好冤枉，嗰刻可能就係呢一樣嘢，嗰陣可能諗唔明。嗰陣時病，俾人話肥，自己都唔係喺一個好好嘅狀態，都想快啲好番，所以都唔開心，唔多唔少都有影響。」離開工作了近7年的TVB，這位09年國際中華小姐冠軍，訪問中謙稱不敢發做主角夢，又表示離巢後會返多倫多小休，及報讀珠寶設計，又會進修一下電影知識，幕前幕後都會拈下。令人疑惑，苟姑娘千辛萬苦瘦身，為咗乜？可能呢一刻佢都未知。
| (攝影：林德雄) | | |
| | | |
|
鍾意就快D Share啦！
|
|
|
