豪語錄
演員的自我修養 周家怡
在幕前打滾近廿年，周家怡始終唔似食這行飯的人。她不揀擇，連敝公司飯堂的出品，都吃得津津有味：「我好鍾意食飯，又唔鍾意嘥嘢。」那半盒茄蛋飯在影樓風乾了三小時，臨走前她還是捨不得，吃到一粒不剩，「好好味呀。」巴掌小臉被滿口飯撐到變形，但飯桶何以身形單薄？「我跑好多步，每次十八公里、一星期至少三次。」練跑也不是為了打咭，而是為了即將擔演的差婆角色做準備，「一路跑，一路諗我喺度操緊，唔停得。」
周家怡習慣入戲。就算演路人甲乙丙，她都會完全上身。角色的性情，也就成了周家怡的性情。在大台拍《火舞黃沙》演兔唇女，上唇長期被鐵線勒住，「講嘢、食嘢會體驗到佢個心理狀態，照鏡知道自己係咩樣，到佢鍾意東昇大哥（陳豪）、知道冇可能嗰樣嘢，（感受）就更加深。」牙套又戴又除，結果弄崩了自己的門牙。拍 HKTV《導火新聞線》，為了演熱血記者，她由不理政治的新聞白痴，變成七一遊行的常客，「做咗主角之後，好多戲路都喺你身上，回憶變得好真實，因為真係有拍出來。以前喺 TVB都有拍，不過喺我腦內拍、冇對手。而家要抽離，會辛苦啲。」一杯清水，撈來撈去，竟釀成了雞尾酒。
尹天仇
有理由相信，在大台那十四年，周家怡就是《喜劇之王》的尹天仇。今天梳妝台上不只有霞姨派的飯盒，還有一本簡體字版的《斯坦尼斯拉夫斯基體系精華》，「十年前喺大陸買嘅，最近又拎出嚟睇，好嘢嚟㗎。」書角翻到有點披口，「佢真係由內而外，教你臨瞓前回想你嗰日發生嘅事；教你由角色出發、諗佢嘅處境。好好玩，入咗呢行就返唔到轉頭。」
多得周星馳，斯坦尼斯拉夫斯基得以在港九新界成名。但在大台一邊等埋位、一邊看《演員的自我修養》，感覺始終格格不入。周家怡應該修讀的，其實是叩門送禮的技巧。一一年憑《花花世界花家姐》的智障角色受注目後，周家怡問過大台會否納她為「親生女」（改簽經理人合約），「已經係好爭取㗎啦，對我嚟講。」
以為她被高層所拒，誰知對口單位僅是藝員科的一名員工。對方轉告「高層冇咁諗」，她也不再糾纏，「佢都係打工啫，我好了解係咩一回事。佢哋咁多人，你又唔係選美出生、又做咗咁多年，唔覺得你仲會有乜嘢……點解要嘥精神時間喺你身上？可能捧個新人仲好。」《導火新聞線》的方凝會跑到皇阿瑪面前拍枱，不會待秘書傳話吧？「冇呀，我同佢哋又唔熟，所以冇直接問。」
若非這種無可無不可的性格，周家怡應該不會甘於在大台消耗青春，「監製都好錫我，俾咗好多機會。甚至我唔係簽 management，佢哋都俾啲有戲做嘅角色我，每套加少少，咁都好好啦。」經過《花家姐》一役，周家怡轉投 HKTV，往後都是歷史，「以前喺 TVB好似讀書，而家出嚟做嘢係實戰。」在大台其實更似一粒螺絲吧，鬆脫了可不易習慣，「尤其唔發牌時。《導火》又唔知會唔會剪埋個後期。我可唔可以繼續做呢行？定係要轉行？咪周圍去 casting，希望可以做落去。好冇安全感，又冇收入。所以我真係好好彩。」
恨攞獎
《導火新聞線》出街後，周家怡忽然成了方凝 BB，獲網民選為「高登艾美獎視后」。往後一連串廣告、電影，都是乘着這角色而來。王維基無以為繼，但周家怡柳暗花明，憑 ViuTV的《瑪嘉烈與大衞系列—綠豆》繼續有工開。淡如水的劇情不合師奶口胃，新一輯男女主角又換上了嫩口的臉孔。但瑪嘉烈和大衞仍可借鄭秀文《我不是歌手》的 MV還魂。周家怡和林保怡甚至拍了一個白咖啡廣告，由造型、班底到拍攝手法都是《綠豆》的延續，惹來 ViuTV強烈不滿，「後來解決咗，好似有向 ViuTV買番（版權）。做演員冇所謂啦，你叫我做就做。我都好開心，可以感受番瑪嘉烈嘅感覺。」「演員就係感性行先。我而家丟低咗方凝、瑪嘉烈，好唔捨得，但你一定要放低……真係有少少變態。」
甚至「高登艾美獎」沒有再搞第二屆，周家怡都可以冧莊成為「網上視后」。有 blogger另起爐灶，舉辦「觀眾在民間電視大獎 2016」。柴娃娃投票過後，居然還訂製了實體獎座。得知周家怡來敝刊做訪問，還專程把獎座送來堆填區。周家怡對那塊阿加力膠珍而重之，「我終於攞獎好多謝佢哋。」「如果將來我會攞多好多獎，每一個我都唔會覺得係阻定。做人為乜呢？老來諗番後生時曾經奮鬥過、為自己鍾意嘅嘢付出。每個獎都係回憶。」
大公司
周家怡在大台時也曾在台慶頒獎禮上列席。憑《花家姐》提名為「飛躍進步女藝員」時，她已經入行十幾年，好友佘詩曼早已榮登視后，「我知道唔會頒俾自己，我太了解成個架構係點。不過有提名已經好開心啦。」周家怡初入行時，無綫在深夜播雪花都有幾點收視。名字與她相近的周嘉儀，每晚六點半在公仔箱坐定定，也就無人不識。事隔數年，無綫由一台獨大，變成一台獨憔悴。視帝視后也換上了亞視面孔。現時黃金時段在播什麼劇集？怎樣都想不起來，「其實我都冇睇。係阿爸阿媽食飯時會開住。」
兩老在電視找不到愛女的身影，始終若有所失吧？「（ HKTV）冇牌嗰時佢哋成日話：點解要走呀？可能而家都輪到你啦。」周爸媽熟悉女兒的脾性，卻不諳大台的遊戲規則，娛樂圈不玩論資排輩這一套。在父母的角度，女兒最好去教書、做公務員、或嫁人，總之穩定壓倒一切，「佢哋成日叫我轉行，知我唔肯，咪話唔走仲好囉。」
戲假情真
周家怡的愛貓最近仙遊。一提起，她雙眼便決堤，難為化妝師的心機付諸眼淚，「好似屋企人咁，佢陪咗我廿年。
由我讀書、到出嚟做嘢、拍拖，佢都喺我身邊。」
「佢唔係好講嘢，但好似好知你想點。見你煩，唔會騷擾你；見你唔開心佢又會靜靜坐你隔籬。」
「我試過返國內拍戲幾個月，一返嚟佢就勁舐我。我 daddy拍片俾我睇，原來佢成日去我間房，跳上床搵我，好得意㗎。」
沒有養貓的人士切勿因此被迷惑。
不是每隻貓都像情人般貼心，肆意嘔吐、驕縱跋扈才是常態。
周家怡也心知可一不可再，「唔養啦，任何嘢都唔養，魚都唔養。」
「我開始諗，啲人點解會出家呢？因為承受唔起生離死別的傷痛。所以我都係少啲寄情喺任何嘢度。」
惟戲假方可情真，「演戲可以演到老。其他嘢真係唔好，好痛。」
撰文：蔡慧敏
攝影：黃志明
攝錄：葉志明
形象：黃碧珊
髮型： Vincent Yeung@ Salon Osmosis
化粧： Aster Phang
服裝： Alice McCall、 Camilla and Marc
鞋履： Ballin
指甲： The Nail Spa
|
鍾意就快D Share啦！
|
|
|