由街坊地鋪發展到進駐商廈潮場， Marshall（左）與 Tracy（右）指希望透過分店賺大錢，盡快還清當初「靠母幹」而得的首批資金。
壹盤生意
2016生意回顧放棄 旺區對抗貴租 平價做主打殺出血路
二○一六年本港經濟乍暖還寒，一眾小店老闆繼續受到三高（租金高、人工高、競爭高）困擾，旺區旺鋪對小店主幾乎「冇得諗」，要突圍而出，進軍二線鋪、諗計轉型成必勝心法。
回顧去年二十三盤《壹盤生意》，猶幸全部都能繼續營業，但大部分被訪者都指生意「只係咁上下」，難以進一步發展。三間有大轉變的生意，都是設在二線區，以平價做主打的食肆。其中「靠母幹」打本百五萬，開型格鐵板燒店「板上」的梁翠珊（ Tracy），更衝出深水埗，到荔枝角開千多呎分店，月賺二十萬。而以主打「騎呢」口味的
荃灣「肉餅哥」阿煇，生意由月賺九萬輕微下跌至七萬，站穩陣腳後想租新鋪衝出荃灣，但面對狼死業主開天索價，計劃一度受阻。而在大角咀開設「 B家」炒辣雞的《愛•回家》醒哥，生意大上大落，由月賺二十萬急跌至月蝕三萬。
未來一年，大財團壟斷旺區情況難以改變，二線區開火，亦能殺出一條血路。
本店靠阿媽 低息貸款開分店 板上鐵板燒
「有人覺得我哋講世代之爭，話阿媽嗰套唔得，係借家人上位。」半年前由菜檔阿媽出手打本百五萬，於深水埗舊區與男友林峻至（ Marshall）開了型格鐵板燒店「板上」的梁翠珊（ Tracy），直認不諱自己是靠母幹，但對於別人認為他們借錢不用還則大感無辜。「有辦法借到筆低息嘅錢，何樂而不為呢？我哋一直都有還錢！事實上我畢業後打咗幾年工，嗰幾年嘅錢根本唔足以去開鋪，而新分店資金雖然唔係向阿媽借，但都係問人借先有。」這次她們不願再講債主是誰；由老區地鋪發展到文青潮場開千多呎分店，燈油火蠟樣樣是錢，燃點起另一火頭卻意外殺出條新血路。
拜文青所賜 分店大賺廿萬
「十二月嘅生意額可以做到接近九十萬，利潤大概係二十萬。」新分店位於年輕人蒲點——荔枝角 D2 Place，以超過二萬平方呎的多用途空間為賣點，吸引不少市集選址在此。在開店首月，得以受惠於場地的聖誕市集活動，錄得喜出望外的成績。「呢間鋪我哋想試吓 fast casual形式，賣高質嘅快餐配埋生啤，另加設咗不少佐酒小食例如薄餅、水牛城雞翼同花洋葱。」生啤沒經消毒處理，口感及味道也較香醇，但保鮮期卻很短。「生啤開封七日後就會打柴，呢個風險都幾大。」對比深水埗，本店已摸慣摸熟的街坊小店模式，分店望走真正的快餐自助式路線。「嚟緊會加設自助點餐機，希望應付好個客流量同出餐步驟，以此店為樣辦店。」
有機也有危；過了假期連連的十二月，接下來的日子才能試出「板上」真章。新分店位於工商廈內，設近八十個座位，迎頭而來的就是應付午晚市以外的冷場。訪問當天，記者見午餐時段店內只有小貓三幾隻，而 Tracy也坦承此為要拆的首個炸彈，「因為荔枝角係工業區，大家返工同用餐時間都好穩定，所以其他時段係冷冷清清。」一向主打後生仔生意的二人，希望吸引大學生前來搞旺個場。「嚟緊二月份我哋會同香港某間大學嘅學生合作，提供八八折優惠俾佢哋，歡迎學生嚟食嘢傾 project，講真我哋又唔會趕人走嘅。」 Marshall計過，每天只要賣到二百二十個飯就足以應付日常開支，目前午飯時段已可達標。
而記者留意到，其 facebook專頁於短短個多月，突然出現了四至五個負評，差不多全數也在狠批店員的服務態度奇差，結果 Tracy又要拆彈。「有啲客人嘅投訴係唔成立，有人反映嘢食嚟到後佢出去再 order，結果返嚟後枱面嘢食俾店員清走晒，我哋再睇番錄影先知佢係走開咗十五至二十分鐘，咁店員誤會都好正常！」不盲反不盲撐，但確有店員態度不佳而冒犯了顧客。「嚟緊我哋會提供名牌俾佢哋寫明店員編號，唔開名嘅原因係想保護員工之餘，有事都追究到係邊個。」
本店預咗無法回本
回顧本店因受累於裝修而令開業成本大增至百五萬， Marshall指早預料難以回本，認為此筆成本可攤分於其他分店。「第一間鋪例如廚房、冷氣、抽風系統各樣嘢，我哋都需要去跟手處理。但是正因為有咗第一間，知衰咩嘢，第二間先可以順利開張。」而分店則以合資形式與另兩名朋友共同擁有，他們同樣出身於深水埗，一個賣肉一個賣菜，成為了「板上」食材的左右門神。
紮根深水埗三十多年的老字號順興凍肉公司，正正是其中一位合資者。第二代接班人的老闆顏彰達（ Rickel）同屬八十後，一開始只是擔任其肉類供應商到現在投資五十萬到荔枝角分店，他看好「板上」。「啱啱識佢哋就已經知佢哋對肉類好有要求，堅持用黑豚肉、一口牛等比較高檔次嘅貨，未來我會喺呢一方面支持佢哋。」看來一團創業火已從深水埗燃燒起，席捲各區。
熱潮一過生意減半 照賺七萬 肉餅哥
「肉餅哥」獨沽一味賣肉餅，鋪頭雖處於一眾車房旁邊，人流稀疏，可說是「死位」，但憑藉主打的龍蝦肉餅，以及其他三十餘款肉餅，甫開業即引來傳媒追訪。一夜爆紅，隨即月賺九萬。但肉餅熱潮一如預期，在幾個月間快速冷卻，大排長龍的日子不復見，高峰時日賣六百塊肉餅，暴跌一半至現時三百塊。
節流保利潤
做少一半生意，自然要大 cut cost。當初打響名堂的招牌龍蝦肉餅，如今限量發售，午市、晚市各二十份，阿煇解釋是讓客人點其他利潤較高的肉餅，「之前營業額成百萬，我以為賺得幾多，到月尾先知無錢賺。原來太多人點龍蝦肉餅，我賣九十八蚊一份，但單係一隻龍蝦已經要近八十蚊，但賣過百蚊的話，客人又嫌貴，惟有變陣限售。」
肉餅哥設三十款肉餅，過往每款先準備二十份，共六百份肉餅。但只有十多款熱賣肉餅不停流轉，「比較冷門嘅十幾款，每日可能預備咗三百幾份，有二百幾份要丟。」食物成本因而大幅提高，有近一年經驗，肉餅哥已經不再做「大嘥鬼」，「冷門口味可能只預備定三、四份，唔會準備廿份咁多。若關門前一小時賣光，我們亦會停售冷門口味。」
節流以外，還要開源。餐牌上加添了多款小食，廿八蚊的迷你炸餃子、芝士炸薯波，三十八蚊的榴槤炸彈，「小食當然利潤高啲，而且正常肉餅每人一塊，但一枱人可以叫幾款小食。」故生意少一半，盈利亦有約七萬元。
飛走「老餅」
阿煇為保持客人的新鮮感，推出煙三文魚、花膠肉餅、鹹柚子肉餅，將部分經典「老餅」淘汰，如梅菜肉餅，在主攻年輕人市場的肉餅哥不受歡迎。廿三歲的阿煇雖然同為年輕人，但他亦不能完全掌握新一代的口味，「我以為食正韓風，整韓國辣椒醬肉餅，港女實鍾意啦，點知每日賣不到五塊。」反而誤打誤撞的怪肉餅，反應卻異常熱烈，甚至有客人食過翻尋味，「當初有個負責訂貨同事，訂咖喱粉變咗咖啡粉，仲打開咗無得退，惟有照用嚟做肉餅。」肉餅哥沒有水吧沖咖啡，多了一大包咖啡粉，惟有死馬當活馬醫，「加落肉餅度做咖啡肉餅，我覺得好苦，一咬落去馬上想吐出嚟。不過有同事鍾意飲齋啡，佢話好食，我覺得可能有人鍾意，於是改良吓，加煉奶喺面，成功中和苦味。」遂創出咖啡肉餅。
炮轟無品業主
阿煇去年五月接受訪問時表示，想半年回本開分店，但到今天新鋪還未開成，阿煇提起便一肚氣，「睇過旺角、觀塘鋪位，傾好晒所有細節，臨簽約我講起我係開肉餅哥，業主知我生意唔錯，馬上反價加租三成，頂手費講好十一萬，之後要收三十萬！」他繼續向那些要賺到盡的業主發炮，「見你好生意就勁加租，搏你會留低，呢啲係無品嘅行為。我覺得你喺香港地有間鋪，都算有咁上下資產，做人應該有品啲！」阿煇已經另覓鋪位，但還未簽約，為免再被坐地起價，他不願透露目標新鋪將在哪一區。
《愛•回家》「醒哥」搞韓菜老十年 「 B家」炒辣雞
說到其中一盤大起大跌的生意，就要數到做完《愛•回家》後開韓菜的「醒哥」朱滙林（ William）。他的韓式餐廳「 B家」炒辣雞，經本刊報導後人氣急升，但之後卻頭頭碰着黑，令生意急跌。餐廳更爆出裝修「走數」及聘請黑工疑雲，令初次創業的醒哥坦言：「搞間餐廳，令我好似老咗十年咁！」
醒哥自拍完處境劇後，上年鮮有在大台露面，原來他集中在內地發展，他坦言大部分時間都離港工作，「主要都喺內地工作，拍吓網絡電影、做吓婚宴司儀咁。今年會開始拍《深宮計》，但嚟緊新嘅《愛•回家》就會成個班底換晒！」說到餐廳生意，他直指經傳媒一連串採訪後，營業額立即有起色，「一出街四、五日之後，啲 booking電話就響個不停，甚至俾客投訴點解打極都打唔通，最多試過一個月做成一百萬生意！」
月賺廿萬變蝕三萬
暑假期間，餐廳高峰時更曾由月蝕數萬暴增至賺廿萬，但至九月生意就急速回落，「睇吓盤數，咦，點解跌咗一半嘅，到第二個月又係咁，更加試過要月蝕兩、三萬，最主要都係平日太少人嚟，維唔到皮！」 William坦言，生意下跌最大原因仍是店鋪選址問題，「好多時第一次嚟嘅客人，跟 Openrice個方法由太子嚟都搵唔到，其實由旺角嚟會好少少，但係搵 Openrice要求改番，佢哋又愛理不理。」
裝修黑工問題夾擊
港大法律系畢業的 William，開業時對自己核數、管理有信心，但除要為生意下跌而「頭痕」外，不幸事件接踵而來，其中一件就是裝修「走數」。記者事隔半年再走訪餐廳，發現每張餐桌上都附設的特色煙囪已經消失，他解釋原來是違反了消防條例而不知，「之前搵咗間裝修公司，同我介紹如果咁整啲煙囪會幾好睇。原本俾晒錢佢應承晒搞掂所有嘢，幫我出埋牌，但到最後先發現好多嘢都唔合法。」他透露要額外花了六位數善後，「佢之後仲同我講要俾多三十萬，唔係就唔會俾番啲證明我，我情願再搵第二間公司整，我都唔會再聽佢講。」現時與裝修公司仍處於膠着狀態，他聲言會採取法律行動追究。
除了破財，這盤生意更令 William惹上官非，餐廳在上年九月捲入聘請黑工案，事件更被登上港聞版。報導指，當時入境處人員帶走他及一名越南籍員工，更慘被網民直指「知法犯法」。醒哥解釋聘請該員工時，她能出示三粒星身份證：「雖然嗰個人唔係我直接請，但係普通人真係唔會質疑張身份證嘅真假，同埋個員工都承認咗佢係故意用假身份證，但下次真係要小心啲。」
William當初用了過百萬投資餐廳，目標一年半回本，他笑指現在想起來也覺得太樂觀，「希望兩年……或者…"最壞打算三年回到本，當生意好嗰時以為做生意係咁簡單，但原來唔係。」為了盡快完成目標，他更決定「劈價」促銷，「好似部隊拉麵同埋豆腐湯飯，試過 lunch賣過百個，會試吓半價賣，同埋晚市都會考慮做放題，我就諗唔同嘅前菜、炸雞同甜品任揀。」又推半價、又放題，會否蝕本，他答：「希望儲多啲口碑先，但係我都唔想蝕嘅。」餐廳雖未回本，但他已打算開分店，「一定搵個多啲人嘅地方啦，屯門或者將軍澳啦，旺角、銅鑼灣租金太貴了。」
眾籌超額九倍 自家製手錶開首間實體店 Eoniq
售賣客人自家設計手錶的本地品牌 Eoniq於去年十月，在網站 Indiegogo發起眾籌，本來籌款目標是五萬美金（約三十九萬港元），但最終 Eoniq成功籌得接近四十七萬美金（約三百六十多萬港元），超額九倍﹗
創辦人黎鈞國（ Quinn）透露，眾籌的支持者有不少是來自香港，令他們得到很大鼓勵外，也作出另一個決定—重投香港市場開設實體店，「我們『夠膽』開店，部分原因是有很多人想我們成功﹗」
店鋪現時有預約服務，客人可預約個半至兩個小時，在職員的幫助下設計手錶，試出不同的配搭，還可以見證師傅現場裝嵌，即日領取。 Quinn補充，以往他們把錶面製造交予工廠代為完成，所以一般需要四個星期才能交貨。但之前他們研發出一套系統，可以自行製造錶面，將個人化設計變成實物，也讓客人在個半小時後便可以領取手錶。由於給中間人的費用減少，每隻手錶賺取的利潤也有所提高，可以投放在實體店的營運上。
力抗同行模仿 搬大鋪兼賣其他產品 行李部
同行如敵國，面對行業激烈競爭的不只「 PhotoGIFT」，還有以較百貨公司低的價錢售賣行李喼的店鋪「行李部」。九十後老闆關志豐(Ken)說，去年接受不少媒體訪問後，其他店鋪爭相模仿，例如改用他們店鋪名字，或售賣跟他們類似的貨品。
為了應付市場競爭，行李部也引入獨家品牌行李喼。 Ken補充，他們是首間取得日本品牌「 Journey」代理權的樓上鋪，賣點是襟用及間隔實用。另外，由去年起， Ken在香港租用倉庫存貨，即時補充店鋪貨品，讓客人不用因為海外訂貨而等候太長時間。
行李部也即將搬至一間新的店鋪，新址面積比現時大兩倍，又會裝修成「專門店」，塑造專業形象。不過，租金也有三倍升幅，所以他們會售賣不同類型產品，例如旅遊指南、出租 WiFi蛋等。 Ken強調不會把租金成本轉嫁給消費者，反而會維持「薄利多銷」做法，「希望成為香港人買行李喼最平的地方﹗」
出租攝影機競爭大 諗好後路轉型拍片 PhotoGIFT
職業是攝影師的蕭國煒（ Sam）知道傳統攝影行業沒有出路，於是創立「 PhotoGIFT」，轉型出租「自拍攝影機」（ Photo Booth）。事隔接近一年，公司已再度「轉型」，主力替企業拍網上宣傳短片，推廣產品及建立形象。 Sam解釋，成立公司初期已預計到攝影攤位未來競爭激烈，所以之前已想好這條「後路」﹗
不過，坊間也有不少宣傳片拍攝的服務，競爭較出租攝影攤位還要大？ Sam認為，市場的服務較分散，只提供單一服務例如「度橋」或製作，而他們的優勢是提供一條龍服務：由策劃、執行至檢討成效的服務。有攝影知識的 Sam除了會擔任短片的導演外，有時也親自粉墨登場，希望其「名氣」可以增加宣傳效果。
「 PhotoGIFT」未來仍會出租攝影機，但會傾向跟商業機構合作，讓攝影機可以長時間擺放，持續為商戶吸引人流，例如照片會同時附上商戶優惠券。雖然賺的利潤不及婚禮或嘉年華等一次性活動，但收入會變得較穩定。
屋邨補習轉型搞埋 app Handlebook
上年一句「贏在射精前」道出了不少家長的心聲，在葵盛開補習社逾十年的蘇廸希（ Trevor）睇穿家長「唔執輸」心態。眼見現時鋪頭被領展（ 823）瘋狂加租，於是決定轉型，開發專為補習班而設的手機應用程式「 Handlebook」，運用「功課做得快有禮物」、「家長每日簽名、鬥快報讀有禮物」，吸納一班師奶及一眾教育中心使用。
事隔大半年， Trevor就指新學期補習社報讀人數創新高，成功抵抗租金升幅，「個 app依家多達一萬名學生、一百三十間補習社用緊，兩邊升幅都多咗一倍。」為了令學生更投入，他加入新功能，「喺堂上玩賽跑遊戲，最快做完功課就有得玩，用電腦隨機抽跑得最快嘅三名學生，可以贏到獎品。」
他曾指家長簽到率達一定數量就有獎狀，而今年初更會舉辦十八區最優質家長頒獎典禮，他透露數百名合資格的家長已表示有興趣參如。至於今年最新發展，他就指要拓展其他市場：「依家好多公司都好重視網上推廣，但如果淨係整 Facebook專頁唔太專業。於是我就用 Handlebook個程式做基礎，幫公司獨立做一個 app出嚟，兩、三日就做到，最平一兩萬就有交易，又可以喺我哋個 app做宣傳，兩個月營業額已經逾二十萬。」
撰文：財經組
攝影：財經組、時事組
ed_bn@nextdigital.com.hk
|
鍾意就快D Share啦！
|
|
|