無綫娛樂主播李漫芬（Fanny）早前宣布成為「準人妻」，她與圈外游水教練未婚夫Alvin（談成坤）將會於本月26日在尖沙咀舉行婚禮，暫預計筵開29至30圍，Fanny坦言對婚事非常緊張，Alvin還笑指自己緊張到爆暗瘡及失眠，驚當天上台致詞時講漏要多謝的人。Fanny則透露當晚邀請了曾志偉、許志安、米雪、歐陽震華、郭晉安等，及《一屋老友記》、《致命復活》的監製和演員同事們。
星級姊妹團
Fanny早前由Alvin陪同下到婚紗店試「戰衣」，大晒事業線的Fanny，獲未婚夫細心地撥弄秀髮及整理首飾，Fanny表示日子甚有意義：「2月26日，2+2+6=10，十全十美，我哋其實冇計過，咁啱係師傅擇日，而揀嗰間酒店係因為呢個係我哋相識嘅地方。（籌備成點？）轉入大直路啦，當日會按傳統儀式，斟茶、接新娘，佢準備要過五關斬六將。」又透露星級姊妹團有陳煒、Kawaii及吳沚默。而Alvin就坦言預了被玩，兄弟團亦已積極備戰：「預咗頸以下地方任玩，因為個樣要影相，同埋唔好食同飲，驚到夜晚會肚痛唔見咗個新郎。」
未婚夫一百分
Fanny續表示由於男友是游水教練，六塊腹肌是其制服，故自己需很努力去keep fit，大感壓力。問到二人被對方哪一點所吸引？Fanny說：「佢好孝順、好有愛心，好似啲小朋友有自閉症、過度活躍症，好難搵游水教練，佢就話佢教，畀人用加倍時間、精神心機去教。」並大讚對方很樂於助人，曾幫自己搬裙、搬屋、甚至洗廁所，更感動得哽咽地說：「之後有次我屋企盞燈燒咗，本身諗住唔理，但佢嚟幫手，自從我爹哋走咗之後，屋企換燈、水龍頭嘅岡位就係我負責，好似有次花灑壞咗用唔到，我唔夠力，心裏面就叫在天之靈嘅爹哋幫下我，如果唔係媽咪就冇得沖涼，心講完，我就有力扭開花灑頭，我覺得係爹哋一直陪住我。所以當我見到Alvin幫手換燈嗰刻，覺得係爹哋想話我知呢個人係值得我相信嘅人。」
勝在夠慳家
Alvin則表示被Fanny的慳家本色所吸引：「佢拎住好多嘢都搭地鐵，用牙膏用到冇都要擠埋，甚至剪埋嚟用，又好孝順同有愛心，融入晒我嘅游泳學生，仲要佢其實好驚狗，呢樣都克服埋，同我隻狗好friend！」問到二人婚後是否會進行造人計劃？Alvin搶閘說：「要計劃，結婚就會計劃，愈早愈好，順其自然。」Fanny補充說：「唔知啊，如果有就係天嘅禮物，冇都冇壓力。」她續說因Alvin樂於助人的個性，令她有少少危機感，她說：「佢當初都係成日幫我先至一齊，所以都驚架，不過佢係好好嘅，拍拖後乜嘢都會同我講。」而Alvin又稱不會介意Fanny因工作需要而衣着性感，笑說：「我成日喺泳池到見慣晒，唔覺得有咩。」Fanny隨即補充說：「如果我拍劇有攬攬錫錫會同你報咗先，你得先拍。」至於度蜜月，Fanny表示因工作關係而要延期數月。
另外，Fanny表示原來早前一同為保險廣告試鏡，誰知Alvin被選中，而自己則落選。問到Alvin是否有興趣做幕前？他說：「如果有機會都想試下，跳出水搵收入，同埋體驗下佢嘅生活。」他續甜蜜稱雖然廣告中的老婆不是Fanny，但現實中卻選擇了她。
服裝：Brenda Lo Atelier
|
鍾意就快D Share啦！
|
|
|