娛樂偵訊
北上扮豬妖 細細粒同梁朝偉拍《捉妖記 2》
陳嘉佳（細細粒）因劇集《老表，你好嘢！》的「細細粒」一角彈出，可愛肥妹形象食住上，一劇接一劇。最近，細細粒憑住噸位被睇中客串《捉妖記 2》飾演豬妖，更被安排與梁朝偉做對手戲！
已飛北京拍攝
15年上映的《捉妖記》，累積票房達廿四億人民幣，成為中國電影史上票房收入第二高的華語電影，續集《捉妖記 2》已於年初在北京開拍。「續集籌備咗成年終於開機拍，今次加咗唔少新角色，主角繼續有井柏然外，仲加咗梁朝偉，連細細粒都有份選中做豬妖，佢二月頭飛咗去北京拍，同梁朝偉做對手戲，前後三日兩夜搞掂晒，難得同影帝合作，套戲卡士又大，細細粒不知幾開心。」知情者說。
瘦面不瘦身
早前，在銅鑼灣見到細細粒，同行還有一位男友人，二人急步入商場，再直上美容院。原來為咗同偶像梁朝偉做對手戲，細細粒走去做瘦面。「細細粒二百幾磅重，又冇意思減肥，肥對佢嚟講係個賣點，不過肥還肥，上鏡塊面太大唔好睇，所以咪去做瘦面，又快又有效，最緊要唔使佢節食嘛。」
一手由王祖藍發掘的細粒粒，去年簽為祖藍旗下藝人，繼續工作量爆燈。正出街的大台劇《迷》，有份演出的她，跟劇中演兄妹的金剛及好姊妹劉思希，不時爆肚演出，在劇中相當搶鏡。
撰文、攝影、攝錄：娛樂組
來源 source: http://hk.next.nextmedia.com
|
鍾意就快D Share啦！
|
|
|
