藝人黃子華及佘詩曼（阿佘）今晚到中環出席電影《棟篤特工》煞科宴，子華表示由開鏡到拍完，眨吓眼已兩個月。問到今次是否碌盡人情牌，找來很多好友客串？他說：「今次趁呢個機會要多謝大家，唔係無言感激，係要大聲感言，呢套戲原本只係需要兩位飾演巨星，開頭搵咗兩個最後係嚟多咗十倍，所以要藉呢個機會好感謝呢班好朋友，我個人特別感謝，係感覺到大家想拯救我唔使再做票房毒藥，係完全出於愛心，領養寵物咁撐嘅，我今日唔能夠逐個多謝，因為實講漏，就一次過講多謝各位！（咁咪超支？）更多謝有人連利是都唔收，仲請埋嘢食咁走咗去，『有言感激』！（介意人話你係票房毒藥？）我係唔介意，我係好現實嘅人，呢樣嘢我係幾舒服㗎！但當然嚟緊就唔好喇！咁多朋友幫咗手，我哋落咗好多苦功，老闆又大膽，阿佘形象又破格晒」
搣甩票房毒藥污名
語畢阿佘即冷笑了幾笑，子華說：「你睇吓佢啲戲都未甩，個衰樣都未甩！」阿佘表示戲中有多個特別造型：「去到結尾個造型，子華係覺得最正嘅，覺得我成個戲應該都係咁！子華說：「唔係醜，但大家冇見過阿佘咁嘅演繹。」阿佘說：「真係第一次。（因為要幫子華搣甩污名？）其實幾可愛㗎！我哋諗咗好耐。」子華說：「係我哋幫佢搣甩本身個形象，其實阿佘有好高嘅塑造性！」
預咗被虐待
對於「巨胸翠如」鄧月平表示有場戲要搏命除子華褲頭皮帶，子華笑說：「因為呢樣嘢我知佢係好投入嘅演員，條皮帶我自己都除唔到，個宅男造型條皮帶係好難除嘅。（有冇尷尬？）我已經過咗呢個階段好耐。」阿佘笑言子華已豁出去，其中一場戲她要穿高踭鞋狂踩「小子華」，子華說：「拍得007呢類戲預咗被虐待，身體都係身外物，當然有做好安全工夫。」
對於有網友提議由一些藝人加入政府部門，子華笑言對文化局較有興趣：「但暫時好似未有呢個部門喎！（點睇有傳陳美齡將做教育局局長？）呢啲嘢我識條紅衫咩？我點知教育局局長要做啲咩，陳美齡又係咩境況，唔深入研究點可以亂嚟。」
林雪中氣十足
拍攝《棟》片期間曾暈倒的林雪，於記者會上精神不俗，祝酒時更主動踎低影相，絕不怕「踎低起身見頭暈」，而他接受訪問時被問到健康狀況如何？他中氣十足說：「冇問題，好好！醫生話我懶啫！」
|
鍾意就快D Share啦！
|
|
|
