一切由《難得有情人》開始，就係呢首歌「如早春初醒，催促我的心，將不可再等……」令當年情竇初開嘅Nuts哥迷上Shirley Kwan（關淑怡），佢除咗有把靚聲之外，配上獨一無二嘅SK Style演繹，聽Shirley嘅歌係品味象徵。就係喺Shirley嘅《戀一世的愛》、《夜迷宮》、《繾綣星光下》、《假的戀愛》一系列經典歌陪同下成長嘅我，儘管佢未婚產子，由型女變成阿媽，但對佢嘅迷戀依然未變，可惜我唔變，佢卻開始出現奇妙的變化，EQ逆齡倒退，長期Keep住神化，完全估佢唔到！
Shirley被封「麻煩天后」其實唔算老屈，呢幾年仲要鑊鑊新鮮鑊鑊甘，4年前就玩「自殺」喺Facebook度留言，熄手機自我「人間蒸發」，嚇到班Friend鼻哥窿都冇肉。靜咗一輪，佢喺去年又搞單離奇墮海，啲人梗係傳佢又想死啦，好在有警方救番條命仔。而Shirley最新神化力作，就係佢喺租住嘅酒店涉嫌刑事恐嚇及普通襲擊被捕，傳有人因租金問題同酒店職員發生肢體衝突，仲有人話：「信唔信我攞刀斬你！」
搞到高層頭都大埋
由「自殺」玩到被捕，Shirley昇華為「堅離地女神」，佢嘅匪夷所思濕滯嘢又點止咁少呢！聽曾經同Shirley共事嘅身邊人講，同佢合作真係要買定幾樽鎮靜劑穩定情緒，否則隨時激到發癲。話說有次Shirley打畀一位唱片公司高層「江湖救急」話要錢，仲同人哋講：「我冇錢買餸，我唔食，我個仔都要食啦，依家好攞錢入嚟愉景灣畀我」高層唔睇僧面都睇佛面，細路仔邊捱得肚餓啫，雖然高層好樂意借錢，但弊在凌晨時分先記得打救命電話，想千里送錢都冇船入愉景灣，結果搞到高層成晚囉囉攣唔知點算好！
又有一次Shirley又打畀一個唱片公司宣傳人員話：「我要架保母車，立即幫我Book。」工作人員查吓工作表睇吓接咗咩工作，點知一睇就發覺嗰日唔使開工， 就好禮貌咁問Shirley要車做乜，點知Shirley就答：「我要車個仔去睇恐龍呀！」由於唱片公司規定非工作叫保母車係要私人自費，最平三舊水一個鐘，以Shirley「沒有最遲只有更遲」嘅風格，分分鐘Book咗車等如白畀車租，兼且呢次車費過千冇走雞，工作人員就答佢話：「不如幫你Book的士啦，仲方便喎！」只係Shirley堅持：「我係明星，唔方便搭的士喎，快啲Book車。」因擔心Shirley唔認數要自閹千幾蚊，結果工作人員就同Shirley提議：「不如我扮恐龍畀你個仔玩，唔Book車得唔得呀？」
啱就自己 錯就人哋
其實Shirley搞成咁，事業走下坡，有話係因為相比同期出道嘅王菲，大家都係天后之材，成就差咁遠。雖然身邊朋友好似曾志偉、譚詠麟、黎瑞恩都畀好多搵錢機會佢，但可惜佢過於自我，只會「啱就自己，錯就人哋」，搞到好多朋友都怕咗佢，連校長都語重心長話：「唔知佢有乜嘢諗唔開……佢有咁多歌迷，又咁多金曲，珠江三角洲有過億人聽廣東歌，佢要的起心肝。」身為佢Fans亦寄語Shirley早日痛改前非，及早走出「夜迷宮」唔好再自困。
|
鍾意就快D Share啦！
|
|
|