現年37歲嘅林盛斌（Bob）同圈外老婆Pearl密密生，先後生咗三囡囡，有讀者報料指近日喺公立醫院撞見Bob嫂Pearl去做產檢，Bob今午終喺facebook分享喜訊：「各位，我正式宣佈：『我又做爸爸呀！』霏霏、熹熹、機機，你哋有細佬嘞！」Bob嫂o依家有咗5個月，預產期係今年9月。成日被取笑天生外父相嘅Bob，打破宿命，雞年追到個仔，9年抱4，不過Bob好似意猶未盡，冇話叫老婆生完封肚。Bob今日回覆《蘋果》電話訪問，難掩興奮。佢話：「忍咗好耐，身邊朋友其實都察覺到，o依家終於講得。」Bob解釋保密真係怕BB小器，佢話：「舊年10月，老婆試過有咗兩星期，11月小產咗一次，可能唔穩定，結果12月又有咗，我同老婆共識咗大約超過5個月，陀穩啲先公佈，同大家分享呢個喜說。好開心上天送呢份禮物畀我，上次冇咗係天意，我哋順其自然，今次又有，真係天畀我禮物。」Bob話照到係囝囝，擺脫唔使做外父，梗係開心，佢話老婆有咗時同三個囡囡講時，即將9歲大家姐林霏兒（霏霏）好大反應，Bob轉述：「霏霏話唔係嘛，又有，你哋唔識控制吓咩？我明白佢大家姐，可能有壓力，霏霏話細佬會成日餓，會成日打人，我估佢擔心分薄咗愛。我同霏霏講係唔會，無論屋企幾多個成員，爸爸媽媽都咁錫咁愛佢哋，愛係無限，霏霏聽咗就話期待細佬快啲出嚟。」Bob當知道老婆又有咗，佢沒介意腹中磈肉性別，佢話：「即使係女，4朵金花，4條Queen都好型，好勁。」當照到係仔，Bob立即好好奇：「唔知囝囝將來同我似唔似樣，係咪又係圓碌碌。我睇咗超聲波，好大兜嘢，叫佢『大兜仔』，呢樣最似我。」
|
鍾意就快D Share啦！
|
|
|