母親節報喜
杏兒宣佈陀B
「寶寶在肚裏做仰卧起坐」
現年37歲的人妻胡杏兒跟老公李乘德結婚兩年趕生B，原來已經靜悄悄造人成功，懷孕超過三個月度過危險期，昨日杏兒趁偉大的母親節，公佈將為人母的喜訊，笑言「李寶寶已在我肚子裏做起仰卧起坐了」，問到BB是仔定女？杏兒說：「𠵱家最緊要係佢健康！」
37歲胡杏兒和老公結婚兩年成功造人，昨趁母親節公佈懷孕喜訊，老公親吻腹中胎兒幸福滿瀉。
參選99年港姐奪得季軍兼三料視后的胡杏兒，於2015年嫁給沙頭角圍村王子、現為獵頭公司行政總裁的李乘德，兩人舉行「祝李杏福」浪漫婚禮，經過兩年努力趕造人，昨趁母親節的大日子，在社交網貼BB超聲波相公佈喜訊：「今年的母親節太特別了，感恩上天送給我們的禮物。我們的李寶寶已在我肚子裏做起仰卧起坐了。」
作悶胃唔舒服
原來兩人飛到馬爾代夫享受Babymoon，在藍天碧海下甜蜜合照放閃，李乘德更跪地親吻老婆腹中胎兒，杏兒接受《蘋果》訪問分享喜悅：「之前一直唔講得，老公都擔心，因為三個月之前都有危險，大家都要保守秘密，好多人都冇講，最尾先同好close嘅朋友同屋企人講，𠵱家順利過渡可以同大家講。」
超聲波相中，屈起雙腳的BB遮住性別。
杏兒成為胡說八道會第一位媽咪，五位閨蜜成員都要做契媽。互聯網圖片
首次大肚的杏兒表示，懷孕初期經常作嘔作悶：「初初陀嗰時會辛苦啲，成日想嘔，好似個胃唔舒服，又冇乜胃口咁，但我諗唔算好嚴重，因為冇嘔過出嚟。」問到會否停工待產？她說：「當然你話拍劇好長時間，又唔係孕婦角色，就梗係接唔到不過唔會全面停工，會揀囉，有啲自己應付得到都會做，不過都要問過老公先，屋企人都擔心，尤其係奶奶，多謝奶奶好錫我，日日喺屋企煮好多嘢畀我食，好照顧我。」至於BB的性別，杏兒笑說：「老公話唔好咁心急住，等佢大個啲再問醫生，𠵱家最緊要係佢健康。」
一齊上湊仔班
杏兒榮升「胡說八道會」第一位媽咪，幾位閨蜜成員都戥她開心，胡定欣昨回覆傳媒送祝福：「終於可以唔使守秘密啦，當然戥佢開心，佢一路好期待，但一路有工作在身，我哋都有叫佢快啲完成工作，好好調理身體。」曾跟李乘德拍拖的舊愛李施嬅，笑言希望五位成員齊做契媽：「我哋都OK㗎，但契唔契我哋都好錫杏兒嘅BB，我仲諗緊想同佢一齊上湊仔班㖭。」問到是否學定做人母？她說：「唔係，我學嚟照顧朋友嘅BB。」
杏兒今年初拍內地劇《那年花開月正圓》時，已懷有身孕。
杏兒在馬爾代夫享受Babymoon，輕撫微隆的腹部充滿溫馨。
另一位人妻成員胡蓓蔚就爆杏兒懷孕後滴酒不沾：「我哋都估到嘅，因為佢都比較錫身，呢排出去飲一杯半杯，佢都話唔飲酒啦，要飲啲暖嘢。中國人傳統未過三個月要保密，我要快啲恭喜佢先，我就嚟做契媽喇！我係大家姐，𠵱家變大契媽！」問她跟老公單立文（豹哥）有否計劃生BB？胡蓓蔚笑說：「我同豹哥近期冇乜時間見面。」
採訪：唐心悠、皓騫、魯吉、嵐山
|
鍾意就快D Share啦！
|
|
|