林敏驄將於6月喺紅館舉行出道三十五年紀念作品展音樂會，日前接受商台《1圈圈星光背後》訪問。林敏驄向來被喻為「填詞界鬼才」，但87年填完張國榮嘅《無心睡 ...
林敏驄將於6月喺紅館舉行出道三十五年紀念作品展音樂會，日前接受商台《1圈圈 星光背後》訪問。林敏驄向來被喻為「填詞界鬼才」，但87年填完張國榮嘅《無心睡眠》後就唔再寫詞，佢解釋：「乜都寫過，乜獎都攞過，冇嘢難到我，冇挑戰就唔再寫。」當年林敏驄跟唔少巨星合作，只遺撼未能為鄧麗君寫詞，佢話：「當年我曾經有機會跟鄧麗君見面，嗰時我身邊仲有李小姐(李美鳳)，佢真是好有星味，之後佢對我講：『我哋有機會合作呀！』可惜，無耐佢就過身，再冇呢個機會。」至於近年為何幫顏福偉廣告歌填詞，佢打趣話：「佢係油王呀！多錢嘛！哈！」林敏驄坦言過30年間，只有少部份嘅廣東歌係合格，仲未達到80年代嘅水準，佢話﹕「我聽頭一句，就知佢哋之後點寫。」不過阿聰都有讚剛合作完嘅黃偉文話﹕「Wyman算係OK，喺創作上，佢頗尊重我哋。」林敏驄曾經寫過唔少經典悲慘情歌，佢承認自己嘅感情經歷較悲慘，佢笑話：「係呀，慘情嘅時候先有靈感寫歌。開心嘅時候，就繼續開心啦。」當年林敏驄秘密跟大美人李美鳳結婚及離婚，之後雖然與第二任太太陳伶俐育有兩子，但最終都係離婚收場，問佢依家對婚姻仲有冇憧憬？林敏驄一反鬼馬，好正經咁話：「當然唔會諗！我現在係安於現狀，見過鬼都唔怕黑咩？結過婚之後，就好似人生遇到一個高人向我一語道破，我先恍然大悟，發覺自己係唔適合結婚。因為我哋做創作呢一行，係需要有好大嘅自由度同空間才能做到，而同時亦有好多事情需要兼顧，係好難嘅。你睇曾志偉，佢係唔會返屋企嘅，咁先能有空間，先能拍出咁多好電影。」佢坦言與前妻所生嘅兩個仔比較少見面，佢話﹕「因為現在嘅小朋友已經有自己嘅世界。」
