熱爆娛樂: 唔願復出　產後唔修身　官恩娜𤷪𤺧湊仔 [壹週刊

2017年6月8日星期四

唔願復出　產後唔修身　官恩娜𤷪𤺧湊仔 [壹週刊 - 1422] __,官恩娜,M1,

產後一直冇修身的 Ella，著淺藍色背心裙，要用牛仔褸遮住手臂肥肉。

探熱針

唔願復出　產後唔修身　官恩娜𤷪𤺧湊仔

兩年前嫁俾混血醫生，官恩娜（ Ella）婚後火速造人，誕下囝囝 Garbriel後， Ella一直停工，專心湊仔， Garbriel眨吓眼就快兩歲，識行識走。日前 Ella湊住囝囝去沙灘玩，唔知是否因為天氣熱， Ella全程黑口黑面，似乎冇乜耐性。

完全冇復出打算的 Ella，產後一直未有修身，繼續向橫發展，呢日見佢著住淺藍色背心長裙，大熱天時都要披件牛仔褸遮住身上肥肉。

唔耐煩

當日下午四點， Ella湊住囝囝 Garbriel在清水灣出現，同行仲有工人姐姐傍住，話咁快兩歲大的 Garbriel肥嘟嘟，好得意。去到沙灘 Garbriel一直踎低玩沙， Ella開頭都興致勃勃幫阿仔影相，仲落手陪阿仔玩埋一份，不過唔夠十分鐘， Ella就開始唔耐煩，著住鬆糕涼鞋的她，有沙入鞋唔舒服，不停揈腳想揈走啲沙，又想催阿仔走人，點知 Garbriel唔理繼續玩， Ella於是夾硬嚟，一手抱起阿仔，但 Garbriel唔就範，踎低再玩過。

阿仔唔聽話， Ella當堂黑晒面，糾纏了五分鐘， Ella終於成功捉到阿仔走，一行三人折返附近商場，沿途 Ella一直拖實阿仔， Garbriel一度想甩開媽咪手四圍走，加上 Ella一度聯絡唔到司機，𤷪上加𤷪。司機一到 Ella拖住 Garbriel急步行，阿仔一個唔小心跌倒， Ella一手抱起阿仔，嬲爆爆上車走人。

Ella踎低陪阿仔玩埋一份。

阿仔叫極唔肯走， Ella於是一手抱起。

離開時， Ella拖住 Garbriel急步行，點知阿仔唔小心跌倒， Ella即嬲爆爆將阿仔抱起。

想追女

做咗醫生太太，上了岸的 Ella雖然同唱片公司仍有合約，但遲遲唔肯開工，完全冇復出打算，專心做家庭主婦，唔使公開見人， Ella產後一直放縱，完全唔修身，當日著住白色長裙， Ella虎背熊腰加「豪華臀」，披住牛仔外套，仍然見到佢身形相當大件頭。

「 Ella之前餵人奶，所以阿仔出世之後一直冇節食修身，加上而家佢短期內都唔打算復出，淨係想日日黐住個仔，佢同老公又有計劃想追個女，所以 keep唔 keep fit都冇乜所謂。」 Ella身邊人透露。