人生有幾多個十年？十年可以有好多變化。快將31歲嘅樂瞳，07年加入無綫，噚日完約，佢決定唔留低往外闖。樂瞳日前接受《蘋果》專訪，講到喺無綫十年得與失，劈頭就說：「呢十年，我搵唔到錢。」未完嘅，樂瞳續道：「但我得咗『樂瞳』呢個名（本名龔茜彤），同觀眾嘅愛戴。好多人喺街走埋嚟問我你下一套劇拍啲乜，佢哋話鍾意睇我做戲，我賺咗呢啲。但我失咗我嘅青春。」【我最寶貴十年都喺公司】「我最寶貴十年都喺公司。但各有得着。當年喺公司時係妹妹仔階段，o依家妹妹仔成熟咗，跳出嚟係淑女。」樂瞳強調係「窈窕淑女」，唔係「熟女」：「我想做一個窈窕淑女，我要再減肥，要再刻苦啲，大家多多包涵。」回帶樂瞳喺無綫十年做過乜？佢喺11年演出劇集《點解阿Sir係阿Sir》，當中扮一名反妹叛學生妹彈出，立即被封「宅男女神」，都算係佢事業一個高峰，樂瞳承認：「講出嚟仲有好多人，因為呢個角色認識我。我喺公司十年，公司畀咗好多機會我，不過人應向前望，如有另一角色令我再有高峰，我都會做好佢。」【試過先心息，我係好勝】
樂瞳其後喺劇集《當旺爸爸》、《護花危情》、《回到三國》、《情越海岸線》等都有突出表現，但礙於無綫花旦眾多，單係每年選美湧出嚟嘅冠軍，仲有監製用嚟用去嘅一批愛將，樂瞳未受點名力捧。高峰回落，浮浮沉沉，十年就過咗。今次決定約滿離開，係經深思熟慮。畢竟無綫女藝人太多，樂瞳又唔會主動爭取機會，所以比較蝕底，佢話：「可能我幾年前細個，內向被動，唔識爭取，冇咁努力。」「喺公司十年都有感情，樹大好遮蔭，但呢個時間想出去試吓自己能力，係咪可以去深啲、去遠啲，想試吓離開comfort zone，係咪可以生存到？o依家手頭都有啲電影傾緊，我決定唔續約，身邊出現好多人幫我，我完全感受到周邊好多力。我想試下用呢十年功力，睇下可唔可喺電影度發展出嚟。」「我試過先心息，我係好勝、任性嘅人。我外表雖然好柔弱，但幾堅強，輸得起、跌得起。」服裝：Mzjj
| （攝影：沈健程、馮嘉銘） | | |
| | | |
| | | |
|
鍾意就快D Share啦！
|
|
|
