現年52歲，專注電影工作嘅雷宇揚，喺2012年同大陸女主播馬荔結婚，長居於廣州，雷宇揚3年前榮升爹哋，兒子雷庭o依家喺廣州就讀國際學校。兒子出世首兩年，雷宇揚要兼顧工作四圍飛，未有時間陪囝囝，今年一家齊齊整整過父親節。雷宇揚同雷庭講到父親節，雷庭有啲不明所以，雷宇揚話：「佢唔知道父親就係爸爸咁解，我哋一直都冇節日觀念，好少節日出去食飯，如果佢開心我就開心，我覺得日日都係父親節，反而節日一定唔會出去飲茶或者食飯，因為我唔鍾意同人迫，喺屋企食飯仲開心啲，唔使煩唔使逼。」家中有咗小朋友之後，生活改變大，雷宇揚話一做完嘢就飛撲返屋企，絕少應酬，雷宇揚話：「佢出世之後兩年，我陪得佢少，想彌補番，不過唔緊要，當時佢未懂性，o依家開始懂性，知爸爸媽媽好親，佢o依家都3歲半，佢去到8、9歲，有自己嘅同學朋友，到時就唔跟我哋，有自己嘅世界，我好珍惜呢幾年，所以o依家多啲返屋企，少啲應酬，有啲工作太遠太辛苦，或者去好多日就唔接，o依家好少見朋友，就算見嘅朋友都係有小朋友嘅，朋友年幾先聚一次，唔會好似以前單身咁，冇嘢做出去飲酒，o依家出去飲酒係零。」對於會否生多個再做爸爸，雷宇揚話持開放態度，佢話：「我抱開放態度，我老婆就話夠，照顧一個都好花時間，如果兩個係好辛苦，同佢去一日迪士尼，我散足3日，同佢玩一陣波波池我底褲都濕埋，我太太重新投入工作都好忙，佢o依家好鍾意份工，又唔想放棄，不過我睇我太太性格都暫時唔會追多個。囝囝話唔要細佬妹，o依家佢3歲呢個階段係好自私，你搶佢嘢佢會同你死過。我屋企有兩隻狗一隻貓，抱佢哋多啲佢（阿仔）都話『爸爸抱我』，成日要教佢分享。」成為父親3年多，雷宇揚指兒子對佢嘅影響不少，佢話：「我以前覺得自己係最重要，o依家係個仔，我張開眼就諗起佢，做任何決定，今晚食咩餸都會諗起佢先，呢個係最大改變，相信所有父母都係咁，呢個係爸爸嘅責任，成世揈唔甩。以前喺國內坐車唔扣安全帶，o依家會扣，我有咩事佢點算，發覺好多人都會有呢個改變，以前去到好遠工作，例如去到烏魯木齊再坐兩個鐘頭車都會去，但o依家除非價錢好正，否則o都會推。」想隨時獲得更多親子資訊，快啲like Easy PaMa Facebook
https://goo.gl/1qWM8g
| 攝影：沈健程 | | |
| | | |
| | | |
|
鍾意就快D Share啦！
|
|
|