52歲的黃家強和日籍太太Makiko育有分別10歲黃慶譽(前名黃慶陽)及5歲黃曜陽，鮮有露面的「小星二代」慶譽原來身高已達爸爸的膊頭，且樣子似足太太日味濃，而弟弟曜陽的笑容就最似家強好冧女。昨日趕返內地工作的家強接受東網電話訪問時被問如何慶祝父親節：「都係食吓飯，兩個仔就送自己畫嘅卡囉。」
「我哋買嘅零食唔會失禮」
家強兩個仔就讀國際學校，談及管教兒子問題，自言小時候和亡兄黃家駒通街走如「野孩子」，當年父母會給他們幾蚊落街「自己搞掂」，但覺得時代不同，故管教小朋友也不能依舊一套，他指：「我哋從來冇畀零用錢個仔，咁細個做乜咁快要錢，唔想佢哋咁快有錢嘅觀念，零食我哋會買畀佢，佢根本唔知有出街買零食呢樣嘢。」家強自誇由父母安排的零食不會令慶譽感「失禮」，他笑言：「佢同學仔啲零食得兩舊蕃茄、兩粒蘿蔔咋，我個仔有包薯片已經好好。（咁你個仔冇有手提電話？）都冇，佢要電話嚟做乜，阿媽成日喺佢隔籬。」
課餘時間亦毋須太多自由
家強覺得小朋友有基本生活物質就足夠，課餘時間亦毋須太多自由，但強調一切都出於關愛非專制，他說：「佢哋冇得一個人出街㗎，家陣好多拐子佬、戀童癖，我好驚，對社會好冇安全感，如果要玩就叫同學仔嚟我屋企，或者老婆帶佢哋去club house；佢哋每日只可以有半小時玩iPad同睇電視嘅兒童節目，冇睇過啲電視劇，因為我唔想佢咁快做老人精。」
「個仔識日文英文，但唔識廣東話」
問他可覺得對兒子管教太嚴像軍訓？家強承認多得太太嚴管，兩個仔才又乖又純，指對兒子不是次次「say no」，好似大仔要求買風靡全球小朋友的指尖陀螺（Fidget Spinner），初時太太不准，最後囝囝當30元的新玩具是寶，他說：「我玩過覺得好無聊，連細仔都買咗個10幾蚊嘅，有啲要成百幾蚊㗎，（買平版畀個仔？）唓，唔係翻版係渣版。」除買玩具有商量外，作為父母在兒子學習方面也會作出「讓步」，正如囝囝只識普通話、日文及英文，但不懂廣東話，他覺得：「廣東話發音好難，如果再迫佢學埋廣東話，怕佢哋負荷太重搞到變啞呀。」
一定要個仔學音樂
至於兩個仔可有遺傳他的音樂才華？家強謂慶譽4、5歲在強迫下學鋼琴，當年見兒子不情願，曾跟太太說不用學，但家強指太太：「佢話唔理，（可以唔學？）係唔理佢鍾唔鍾意都要學，依家咪幾好，佢對音樂開咗竅，老師話佢吹小號好有天分，佢知音樂要有基本功，唔使逼自己都繼續練鋼琴。」
|
鍾意就快D Share啦！
|
|
|