探熱針
學霸有錢途 麥明詩密食袋兩百萬 朱千雪唔拍劇執三球
今時今日，大台一線姐仔吸金能力未必最強，高才生反而更易搵銀。 15年年中申請停工，先在中文大學完成企業傳播社會科碩士，去年再在城大修讀法律的朱千雪，憑形象入屋，唔拍劇依然大受廣告商歡迎，過去一年拍五個廣告袋三百萬。 10A有腦港姐麥明詩，識抽水引發話題，密食當三番搵二百萬，學霸好有錢途。
60萬拍廣告
12年民選港姐「冠軍」朱千雪向來有觀眾緣，雖然跟王浩信合作的《 EU超時任務》高收有口碑，不過為圓律師夢，去年繼續做學生在城大讀法律，間唔中放長假才客串拍劇，無孭飛劇集，但依然人氣旺，正出街的電視劇《踩過界》，網民就講明最期待朱千雪出場。
「千雪做咗兩年全職學生，人氣依然冇跌過，啲廣告客仲係好鍾意佢，呢一年佢接咗五個廣告代言人，連駕駛學校都搵佢，一個代言費 60萬，仲要放假就出活動，起碼搵過三百萬。以前拍劇日踩夜踩，可能抽唔到時間拍廣告，讀書時間穩定，仲搵得多啲，佢仲有廣告未出街。」知情者說。
朱千雪修讀的法律課程，學費一年十幾萬，最初轉做全職學生，她笑言要半工讀慳住使交學費，過去一年少拍劇反而豬籠入水，連當事人也始料不及。
教做功課
10A學霸麥明詩， 15年參選港姐時人氣爆燈，劍橋法律系畢業的她更成為當年搜尋人氣榜第三位，有人氣又識發揮熱門話題，吸引新一代追看她的 facebook，兩年多時間，粉絲人數已經升到十八萬。
「 Louisa呢一年真係搵唔少，拍咗六個廣告，未計佢 po產品嘅收入，好似啱啱拍完嘅跳舞學院廣告，就係睇中佢有芭蕾舞底， Louisa仲會自己度埋橋，好似搵摩天輪做背景，喺中環跳芭蕾舞，都係佢嘅主意。其實佢好耐冇練過舞，嗰日仲堅持唔用替身，拍完廣告又即刻要入廠拍劇，啲錢唔係易賺㗎。」知情者說。
大台近日力谷 big big channel，全部藝人都要為公司拍片增加點擊，有人唱歌有人跳舞，大台就點名要求兩位學霸教做功課同分享讀書心得，繼續發揮強項。
隱形金蛋
除大台小生花旦，部分吃得開的二、三線藝員，亦是𢱑銀實力股。網友勁 buy的節目《學是學非》，亦帶挈黃心穎搵錢，另外兩位女主持麥美恩同梁嘉琪，同樣是大台吸金力強的隱形金蛋。
麥美恩
主持之中，自知姿色不足的麥美恩，索性豁出去走搞笑形象，結果憑她奔放的主持演繹，贏盡唔少網民及廣告商的心。接唔少 MC騷外，同樣受平面、網絡廣告歡迎。有傳她 MC騷身價兩萬起跳密密執，月入六位數，是大台其中一個隱形金蛋。
梁嘉琪
03年演藝學院榮譽學士畢業的梁嘉琪，在有線做過主播， 07年跳槽到 TVB，直等到 13年開始主持《學是學非》，及在劇集《愛我請留言》表現好，司儀薪酬升至中價一群。據悉有觀眾緣有口才的梁嘉琪，數年來密食當三番，每個月至少跑到八場司儀騷，入息分分鐘可觀過班姐仔。
撰文、攝影、攝錄：娛樂組
|
鍾意就快D Share啦！
|
|
|
