【錢銀實驗室】李嘉誠貴為香港首富，或者你會認為，佢伸一伸手貴過你全身係理所當然嘅事。不過，如果你早排有碌Facebook嘅話，或者你會睇過一條彭博訪問片。片段入面，李嘉誠提到自己戴隻錶！勢估唔到世界頂級首富李嘉誠，竟然只係戴一隻價值幾百美元嘅日本錶。本報向鐘錶專家反覆研究影片，估計李嘉誠隻錶，係星辰錶（Citizen）Attesa系列嘅「ATD53-3051」。綜合超人早年嘅內地專訪及彭博訪問，李嘉誠有次喺日本機場免稅店，見到呢隻錶，於是一試便愛上。佢之所以咁鍾意呢隻錶，就係因為方便！佢解釋，隻錶一來輕，又係行光動能，即係有光就識行，電都唔使換；仲要防水，游水都戴得。超人仲話，因為佢唔算貴，打Golf戴住都唔使就住就住。佢仲鍾意到，特別訂咗100隻用於贈送朋友。價錢方面，上述隻日本製嘅星辰錶，香港定價6240蚊，但佢只可以收日本電波時間。不過呢方面，又對超人冇咩影響，因為佢曾喺訪問時講過，自己有個習慣，會將手錶時間調快半小時，方便自己安排工作時間。至於呢隻星辰錶，據悉香港錶行都會有貨；但如果想貪心啲，用「超人錶」款但係接收國際電波呢，就要搵一隻較新嘅國際版，型號「CB3015-53E」，可以接收中國、美國、歐洲、日本標準時間電波。不過呢隻就會貴啲，定價係7080蚊。記者：倪敏慧
攝影：卓振輝、陳家文
剪接：張展陶
編導：陳家文蘋果財經，關心你飯碗
http://fb.com/appledailyatm
|
鍾意就快D Share啦！
|
|
|
