350賓客開P 鍾嘉欣閃避舊愛伍允龍
王君馨婚禮狂咀老公「唔想咁快生仔」
現年31歲的王君馨告別處女黨，昨日在淺水灣跟圈外老公Daniel舉行浪漫婚禮，宴請350名賓客。着deep V高衩婚紗，大晒33D兼長腿的君馨，興奮狂咀老公兼送歌示愛，並由人妻鍾嘉欣擔任伴娘，偏巧跟舊愛伍允龍同場，兩人互相閃避免贈興。岑麗香、李亞男及苟芸慧等亦做姊妹陪嫁，祝新娘子三年抱兩，君馨大笑：「唔想咁快生。」
【共諧連理】王君馨跟拍拖12年的Daniel結束愛情長跑，昨日在淺水灣舉行婚禮，戴上閃爆婚戒及訂婚戒指（小圖）。
贏得07年港姐亞軍入行的王君馨，是虔誠基督徒，堅守拒婚前性行為的戒條，將初夜視為神聖的禮物留給老公，數月前她跟在紐約任職銀行業的男友Daniel於香港註冊，上月兩人在紐約舉行婚禮，並特登選昨日拍拖12周年紀念日，於淺水灣的美國會舉行結婚酒會，人妻鍾嘉欣擔任伴娘，李亞男、苟芸慧、岑麗香、衛蘭及裕美組成至索姊妹團陪嫁。
昨午近4時，姊妹團伴着一對新人出場，君馨着deep V高衩裙在樓梯上拍照時不慎走光，興奮的她跟老公兩度親嘴共十秒，姐妹勁叫：「So sweet！」之後到佈景板前拍照又甜蜜咀嘴，君馨體貼幫老公抹走唇膏印，老公忍不住再錫錫老婆。約5時30分，會場奏起《From This Moment》音樂，婚禮開始時新郎先進場，換了白色低胸婚紗的君馨邊唱歌邊入場，浪漫滿瀉。之後進行切餅儀式，一對新人深情互望，君馨說：「覺得好開心滿足，冇諗過婚禮咁感動，一聽到首歌就喊，老公完全唔知道我會唱歌畀佢聽，問我揸住支咪做乜嘢？成功畀到驚喜老公，呢首歌代表我對佢嘅愛，佢今晚會畀驚喜我。」
【透視晒腿】換上透視婚紗的君馨，蹺着老公手臂進場。
【索爆姊妹】處女黨好姊妹及衛蘭和裕美吻賀新娘。
【唱歌示愛】換上白色婚紗的新娘子，邊入場邊唱《From This Moment》送給老公示愛。
讀誓言爆喊
君馨受訪時坦言心情好緊張：「見到佢就好開心，最感動係一齊讀我哋寫嘅誓言，一讀就喊，我講：『無論他朝有一日，我遇到更了解、更好、更靚仔、更本事、更適合嘅男士，我都依然揀佢。』老公就話好期待同我生活，了解我更多、發現我更多。」君馨又大讚老公：「因為佢好怕醜，總之我同老公仔講，記住四樣嘢就得：say hello、派利是、恭喜、走！覺得老公好合格，一陣都會錫番佢。」
榮升人妻的君馨，左手戴上閃爆大鑽戒，她說：「係婚戒同訂婚戒指合併，自己唔知幾多卡，覺得係無價。」問到造人計劃？她坦言：「會有兩、三年二人世界先，同老公共識咗，佢放棄外國一切返香港生活。」眾姊妹祝她三年抱兩、連生貴子，君馨大笑：「我唔想咁快生仔，大家唔想睇我拍劇咩？希望兩年後連生貴子。」並坦言婚後不會退出娛圈。
一對新人切結婚蛋糕，嘉欣ＢＢ（左二）及衛蘭道賀。
鍾嘉欣與舊愛伍允龍同場出現，兩人互相閃避免尷尬。
嘉欣戲癮發
昨日君馨宴請約350位賓客出席結婚酒會，人妻嘉欣更留港任伴娘，怎知跟舊愛伍允龍冤家路窄，而伍允龍的前度劉佩玥亦同場，偏偏嘉欣和伍允龍更分站左右受訪，之後伍允龍走過嘉欣面前，兩人互無交流。
更巧合的是，嘉欣和伍允龍本來都不能出席婚禮，嘉欣說：「本來今次出席唔到，因為有工作要留喺香港。」有傳她會復出拍劇？嘉欣說：「公司有搵過我，自己都有戲癮痕咗好耐，總之𠵱家囡囡同老公係大前提，遷就到就可以拍。」伍允龍則說：「本來喺深圳拍緊嘢，但時間啱趕過嚟。」對於跟舊愛同場，他扮儍說：「係咩，我未見到佢喎，大家都好耐冇見，見到對方都會打招呼，自己dry咗好耐。」
採訪：卓寶花
攝影：陳俊強、陳順禎
|
鍾意就快D Share啦！
|
|
|