男人無論有咩恩怨，係唔係忍吓就得，有啲一唔妥，隨時可能一世都唔妥。好似今日咁，本來不相往來嘅余文樂同陳冠希，忽然又有「火花」，陳冠希忽然喺Ig寸樂仔嘅時裝品牌。余文樂同陳冠希當年差唔多時間出道，起初都老友，可能大家嗰時都係後生仔，有時出席公開活動都有「咬耳仔」傾吓偈。講到佢哋啲恩怨，就要追溯返去2003年《勁歌頒獎禮》，疑因爭獎、爭阿嬌，喺後台爆粗(新聞連結：http://bit.ly/2vwzfdr)。有指係因為余文樂失意新人獎，又同陳冠希同時追求鍾欣潼(阿欣)而不和，據知當時陳冠希喺紅館後台同朋友傾得幾開心，點知余文樂路過，膊頭同陳冠希相撞，陳冠希即望向余文樂，而余文樂就不滿咁問：「睥乜×？」陳冠希回敬：「乜睥乜×呀？」火藥味濃，陳小春同工作人員目睹經過，有人即時對樂仔同陳冠希講：「唔好玩呀！」之後樂仔同陳冠希都各自散開。點知件事未完，仲出咗兩個版本，一眾歌手坐會場外嘅旅遊巴士，準備去美麗華酒店出席慶功宴……版本一係……余文樂忽然向巴士上嘅陳冠希豎起兩隻中指兼撩「隻揪」，陳冠希聽到即衝落車，工作人員將佢哋拉開，陳冠希返回巴士，自言自語咁話：「佢黐線，黐線！無端端×我××！」余文樂改坐公司安排嘅保母車去慶功宴。另一個版本係陳冠希坐上巴士後，將頭同手伸出窗外向余文樂做咗一啲動作，令樂仔解開西裝鈕扣，即場講：「你係咪想打？」陳冠希仲喺窗邊陰陰嘴笑，樂仔先陳冠希「落車隻揪」，有傳當時拉開樂仔同陳冠希，就係李克勤同劉德華做「和事佬」。呢件事就連「樂壇校長」譚詠麟都忍唔住喺慶功宴搭住樂仔膊頭，同在場記者講：「做乜？冇事呀，兩個都冇事，打乜交，要打就 set擂台、日子出打，要打就練一個月先打」搞到樂仔都好尷尬。之後佢哋喺娛圈發展時，因為拍電影《頭文字D》同《無間道》系列，佢哋都有繼續扮friend，之不過件事過咗14年，陳冠希o依家都步隻腳踏出娛圈，而佢同樂仔又係以潮人潮牌自居，咁為fashion嘅嘢，再起「火花」都唔出奇嘅!
|
鍾意就快D Share啦！
|
|
|
