卓韻芝上載一張麵店員工相指遭不禮貌對待，相中人兼麵店店主蔡先生就咁講！（資料圖片）
前DJ卓韻芝昨日在社交網上載一張麵店員工相並怒轟這間麵店，她指與婆婆去食麵時覺得湯底有怪味，要求換一碗麵，卻遭店員不禮貌對待，事後她更直斥該麵店令香港地道美食蒙羞。
唔覺卓韻芝當時惡
東網透過電話聯絡到相中人兼麵店店主蔡先生，講到事發經過，他說：「卓小姐耐唔耐都會嚟食嘢，佢尋日食食吓叫我過去，話碗湯冇味，我話冇可能，因為啲湯嗰日整咗好多碗粉都冇問題，冇人投訴，佢就叫我換，但我話都係換番同樣嘅湯嚟，不如換另一樣嘢食，但佢死都堅持食番，換完畀佢佢都話碗湯同佢之前食開嘅一樣，佢哋仲食清光添，畀錢嘅時候都好正常。」問到阿芝當時態度是否惡劣？他指不覺阿芝惡，但認為對方過份緊張婆婆，所以比較過火，他又指知道阿芝當時影了他的相：「我唔驚，我哋正經做生意，我哋都有處理個問題，佢唔接受都冇辦法。」
唔怕公審
至於當時為何不試飲一啖阿芝指有問題的湯？他說：「佢阿婆飲過點飲，依家香港啲感冒菌咁犀利，佢係咪強人所難先。」對於阿芝將相片及事件放上網公審麵店，蔡先生表示再回應只會將事件再放大：「我唔會理咁多，影響點都會有啲，但網上嘅嘢，一星期都差唔多收皮，同埋網上都唔會一面倒嘅。」
「令香港嘅港女蒙羞」
提到阿芝今日再指責他不肯相信是廚房出錯，蔡先生再次表示不回應太多：「費事啦，由得佢講乜就講乜啦，當我當黑（佢話你哋令香港地道菜蒙羞。）佢都令香港嘅港女蒙羞，唔需要再執着呢啲喇，香港太多爭拗，唔好搞咁多嘢，都知佢麻煩，但佢咁小事都咁上心，想佢過番啲平靜生活。」又指他的麵店微不足道，不能代表全港的地道美食：「香港仲有雞蛋仔、點心嗰啲，唔好將件事賴落整個行業度啦，令香港一文不值咁。」
來源 source: http://hk.on.cc
|
鍾意就快D Share啦！
|
|
|
