當晚離開會場，劉華親自抱住 Hanna上車。
娛頭
劉華喊晒感激朱麗倩 佢一路等我再企番起身！
今年初，在泰國意外墮馬導致骨裂的劉華，經歷長達八個月的復康期，而家行得走得，第一時間要同「家人」粉絲見面。
即將踏入 56歲生日，上週六（十六日）劉華在九展大搞生日 P，同二千名粉絲提早慶生，一向將老婆朱麗倩同囡囡劉向蕙（ Hanna）收收埋埋，但每逢 Fans Club聚會都例牌安排她們現身，劉華更將住院時的片段剪輯製成 MV播出，片中瞓喺病床的劉華，有 Hanna幫他抹腳，又餵他飲水，場面感人。之後劉華更喊住多謝老婆：「佢一路等我再企番起身！」
患創傷後遺症
開騷前五分鐘，「女主角」朱麗倩拖住 Hanna，同劉爸爸、劉媽媽齊齊進場，坐在第一排正中位置。約八點半正式開騷，打頭陣播出劉華圈中老友們預早錄好的短片，當中包括 Sammi、城城、 Kelly、許冠傑、譚詠麟等，粒粒巨星。
當晚劉華更碌盡人情卡，搵埋吳君如同鄭中基現身做嘉賓搞氣氛，其間又將老婆阿女擺上枱，君如踢爆劉華最驚係「小公主」（ Hanna），嚇到劉華即刻兜番：「係大公主（朱麗倩）……記住所有男人聽我講，驚大公主好過驚小公主！」
之後劉華仲大爆住院時的情況：「冇啖好食啦，喺醫院度應付啲護士，因為我未試過喺床度 bubu（大便），成日都驚有人衝入嚟。頭先個護士阿頭仲叫我得閒多啲入嚟住，啋過你咩！」
跟住又突然收起笑容，轉 channel用國語話：「我受傷後，我真係有一點點創傷後遺症，醫生叫我不要再想，事情已過去了！」最後又再提到最新病況：「嗰啲叫做神經末梢（尾龍骨位置），咁佢又話一年啦，再唔係就兩年啦，如果兩年都唔好就唔好㗎」
Hanna病榻陪伴
不過好戲在後頭！節目去到中段，開始放洋葱，原來劉華預早將住院時八個月的片段，剪攝製作成 MV，更親自改編了自己的歌曲《來生也需要你》，送俾老婆同阿女。
「天光天黑我都想妳 全為妳生 死心塌地 爸爸媽媽太喜歡妳 求下輩子 一世陪妳……」
大熒幕隨即播放一家三口在醫院時的片段，瞓在病床的劉華，有阿女餵飲水，又拎住毛巾替他抹腳，幫他按摩雙腳，跟住一家三口又在病床前溫馨自拍，朱麗倩陪住劉華在病房學行，場面感人，在場不少粉絲亦感動落淚。
喊住多謝老婆
播完片之後，劉華強忍淚水感激老婆：「好多人都話我太太好堅強，我出事嘅時候佢都好似冇乜事咁，但每一日佢都為咗我再企番起身，一路喺度等……如果將來我仲會咁唔小心嘅話，我一定第一個罰自己，我應承你哋，我唔再騎馬」講完後，隨即用手抹眼淚。
輪到切蛋糕環節，全家總動員上台晒冷，先由劉爸爸開香檳，之後全場大合唱生日歌，不過 Hanna就好怕醜，一上台即刻扭計要爸爸抱，開頭仲一直伏喺爸爸膊頭，要朱麗倩出馬氹番，先肯同粉絲們揮手，最後一家三口頭貼頭影大合照，甜到漏！見劉華單手就抱得起阿女，粉絲們真係可以放心晒喇！
天王都冇面俾
話咁快 Encore時間，劉華唱到《笨小孩》時，原本打算抱阿女上台，仲話：「呢首歌係我個女揀㗎！你上唔上嚟呀？」不過台下的 Hanna就冇面俾，即刻擰晒頭，仲伏喺媽咪心口。唱唱吓，劉華又撩阿女話：「你睇！呢度得你一個唔理我咋！」點知 Hanna一於睬你都傻，索性用手指塞住耳仔，搞到劉華勁冇癮。
直到完場，朱麗倩拖住阿女返入後台。離開會場時，有過百粉絲在停車場守候，朱麗倩先行上車，之後劉華抱住阿女上車，怕醜的 Hanna，繼續樹熊一樣攬實爸爸，一家三口在粉絲護送下離開。
照顧周到
今年一月在泰國拍廣告時不幸墮馬受傷，傷勢嚴重，需要全面停工，而太太朱麗倩全程陪伴照料，施展分身術照顧老公和囡囡。
飛撲泰國
據知劉德華受傷後瞞住朱麗倩及家人，但太太得知後即大為緊張，火速飛抵泰國陪華仔搭專機返港，抵港後亦早一步離開機場，趕到醫院打點一切。
日日兩頭撲
在跑馬地養和醫院留醫 50多日，太太朱麗倩日日在醫院陪伴，平日送完囡囡向蕙返學後，即到醫院照顧華仔，陪傾偈食嘢，直到晚飯後才回家，又要照顧向蕙，醫院、屋企兩頭頻撲。
親自煮三餐
朱麗倩並無假手於人，每日親自主理華仔三餐，有時更會親自到街市買餸，揀新鮮食材煲愛心靚湯，等華仔食得開心又健康。
手尾長
神經末梢是神經末端，如果因脊骨撕裂令神經末梢受損，大腦會產生錯誤疼痛訊號，患者下半身及雙腳會突然出現像麻痺、針㓤、灼熱、閃電等症狀，身體脊骨亦不及以前有彈性，患者需要接受手術、食止痛藥或長時間做物理治療，快則一年，慢則兩年，等待脊骨自癒，但要完全康復便因人而異。
撰文、攝影、攝錄：娛樂組
|
鍾意就快D Share啦！
|
|
|
