探熱針
日踩 18粒鐘 29歲趙勁皓擁 6間鋪
大隻仔趙勁皓（ King）今年雙喜臨門，三月女兒踢踢（趙安嵐）出世，年底跟 Da Da（盧頌之）到日本旅行結婚。現年 29歲的他，早已經擁有四間食肆兩間健身中心，去年底在葵涌開業的漢堡包店，因抽風系統出現問題被迫結業， King隨即在銅鑼灣搵地方再開。自認是工作狂試過日踩十八粒鐘的他，為了兼顧做個好老豆，半夜回家都堅持湊女換尿片。
半夜返屋企湊女 著住三角底晾衫
年中無休
中大畢業的趙勁皓，大學生時代已經開始半工讀，教健身做籃球教練，夜晚再返夜店做 bar tender，做生意經驗豐富，就算四年前入行做藝人出寫真， King依然不離老本行。
除準備即將在銅纙灣開業的西餐廳外，投資的還包括兩間 King's Fitness健身中心和跟陳柏宇夾份開的酒吧、以及「北京老家」等三間食肆，由於 King喜歡落手落腳做埋營運，所以 Da Da最初誕下女兒「踢踢」，第一次做媽咪壓力大， King被老婆投訴太少時間放屋企。
「以前我生活唔悶得，會有三至四晚喺酒吧，幫手營運同招呼客人，幾乎年中無休，冇乜去旅行，「而家除咗拍嘢，冇晒夜生活，俾多啲時間屋企」，星期日一定放假陪 BB，係 family day。 Da Da生踢踢無耐，會 share好多做好爸爸嘅文章俾我，所以而家就算點忙，每日都會幫 BB換一次片，堅持做爸爸責任。試過六點開工拍嘢，半夜返到屋企，我都會餵奶。」 King說。
不再大男人
趙勁皓做慣決策，跟 Da Da共同生活組織家庭後，不再是大男人，家內事情由老婆話事，他則負責對外工作，至於女兒學業，兩個都十分着緊，主張十三歲送踢踢出外讀書，他早已經買了一份教育基金，待女兒半歲，他又買多一份人壽保險。
「我唔係出生於富裕家庭，起步比人慢，要付出努力比其他人多，而家做咁多嘢，都係想自己下一代唔使咁辛苦。我希望佢夠錢去外國讀書，拍戲時同輝哥（張兆輝）傾偈，佢都話小朋友十三歲語文吸收能力仲係好強，有一定中文基礎先送去外國，等佢哋有獨立能力，又有一個好環境學英文。」 King好有計劃。
榮升老豆，不再一味衝的趙勁皓覺得是時候回饋社會：「我好慶幸自己有少少成績，所以參與多咗慈善，早排捐咗錢俾母校，整咗間健身房，希望可以回饋社會。」
A&F紅褲仔跑出
身為老闆，又是人父的阿 King（趙勁皓），早年為香港籃球聯賽男子甲一組隊伍香港遊樂場協會籃球隊的前鋒，之後轉投超敏籃球隊。
不過他並非因此打出名堂，而是憑「肌」出位， 12年 A&F香港分店開張，他獲選為香港代表，與一眾外地男模，一身爆肌配激凸紅褲仔備受矚目。隨即被睇中踩入娛圈，做周秀娜師弟，跟 Dominic（何浩文）同期出道。
「肌」不可失， 13年食住個勢出寫真，以性感人魚線為旗號做爆肌男神，吸引唔少粉絲，更因此獲封為「爆肌柯震東」。之後跟師姐周秀娜在電影《兜售回憶》連場激吻肉搏。
肌肉發達又有腦的阿 King，不單只以 Body吸客開健身中心，近年在商界狂發力，生意瓣數多，年輕商家形象比當年爆肌男神更為突出。
撰文、攝影、攝錄：娛樂組
|
鍾意就快D Share啦！
|
|
|
