新秀出身嘅海俊傑今年3月喺澳洲同化妝師 莫家慈(Effie)結婚，今日喺港島海逸君綽酒店補擺喜酒，好多圈中人會出席，包括黃依汶一家三口、關錦鵬、翁虹、斑斑、姜大衛同老婆李琳琳、陳雅倫、鄭希怡、王合喜、洪天明、姜皓文、趙學而、葉佩雯、黃佩霞、李蕙敏、關寶慧、梁敏儀、林偉、吳浩康、李逸朗、黃一山、李國麟、王書麒同老婆許秋怡、劉錫賢、林雅詩、陳欣健等等。
而傅穎及彭敬慈則任伴娘、伴郎，陳國坤就係兄弟團成員之一。據知，陳慧珊亦會同老公到場祝賀一對新人，但就未能留低食飯。
海俊傑與老婆及一班兄弟姊妹出來給傳媒影相，事後佢就一個人接受傳媒訪問。問到今早接新娘時，有冇被玩？佢話：「都係除鞋，跳吓石春咁，都係好簡單，班姊妹都唔係玩得太過激烈。」講到開門利是，海俊傑就笑言預咗9億，跟住佢就話都係唔好講啦。
至於愛的宣言，海俊傑就話會愛老婆一生一世喎，「大家一齊都五年時間，一齊走過，今年三月喺墨爾本簽紙，4月8日就喺北京擺酒，因為媽咪好多朋友都喺嗰邊，算係一個小型啲婚宴，今日再返香港搞囉。北京嗰次其實都有好多香港朋友出席，香港就擺30圍。」海俊傑仲話，拍咗一個微電影同搵咗陳容森作咗一首歌《祝福》，送俾老婆，MV入面仲搵咗沙畫大師配合整咗個MV。
造人計劃方面，年屆44歲嘅海俊傑就話：「梗係想啦，最理想當然係一仔一女啦，不過有一個都已經好好㗎喇！」剛於泰國同彭敬慈完成一部驚慄片，婚宴後休息一日就要飛返上海繼續工作，暫時諗度蜜月住。海俊傑提到賓客：「原先劉嘉玲話會出席嘅，佢O依家去咗美國，所以嚟唔到，但佢都送咗一對好巨形嘅龍鳳鈪俾太太。」
| 攝影：陳慧安 | | |
| | |
來源 source: http://hk.apple.nextmedia.com
|
鍾意就快D Share啦！
|
|
|