麥明詩今日去鑽石山為閱讀頒獎禮任頒獎嘉賓，負責頒獎俾潘迪華、東方昇、伍家謙同李家鼎等，台上麥明詩話自己曾經有諗過出書，不過暫時冇靈感，都冇咩料 ，寫書係好大工程需要好大毅力，以前中文作文要寫千幾二千次都覺得好辛苦，所以o依家都係得閒喺facebook寫下先，或者考慮到時將呢啲文章集結成書。
問到如果寫書想寫咩題材？佢話：「會寫娛樂圈題材，好多人對娛樂圈都有好多錯誤嘅觀感，或者覺得娛樂圈好黑暗，但真實嘅行業入面有好多好用心工作嘅人，佢哋好辛苦。」麥明詩又話希望有朝一日可以寫劇本，佢話：「題材都會係講愛情為主，應該會加入自己真實生活嘅經歷。
麥明詩日前搭的士時，畀的士司機喺facebook出post，話麥明詩喺找錢時冇收毫子，佢話：「有啲無奈，我覺得香港人特別鍾意對立，其實成個搭車過程我哋都冇爭拗。」麥明詩話平時都習慣咗找錢淨係要整數：「當時係找55.6，我話毫子唔使啦， 可能對方想保障自己於是就出post先。」佢仲話唔介意對方咁樣做，只係介意對方公開住址：「希望下次唔使咁詳細講我個地址出嚟，如果可以早日推行電子收費，就唔使有呢啲爭拗。
李家鼎第一次出個人食譜獲頒《最佳飲食旅遊書》，話近來都係忙緊打理私房菜館，佢話：「一早要返鋪頭驗來貨，收舖後又要開會，每日得3、4個鐘瞓。」另外，現年87歲嘅潘迪華獲頒《最佳文史哲書》，台上講到發現時下現香港人生活得唔開心，寄語年輕人多睇書，做好本份多啲笑容。
|
鍾意就快D Share啦！
|
|
|
