Ansheles俄仔有女友 Asha餵食乳酪，冧爆！
探熱針
港女無行 俄仔 Ansheles冧爆女友玩互餵
22歲操流利廣東話的俄羅斯靚仔 Artem Ansheles（俄仔），因製作短片《請媽媽飲涼茶》及以急口令方式成功挑戰「麥兜點午餐」在網絡爆紅，是近期首選「 hot guy」，在香港生活了四年的他，除咗為 viuTV節目擔任主持外，最近仲同余安安合作參與劇集《迷失假期》！
初嘗拍劇嘅滋味， Ansheles同英菲混血拍檔 Asha（徐[!8EAF]喬）朝夕相對拍出真感情，趁住假期，一對小情侶現身中環拍拖行街，一見面就攬到實，熱戀情侶一杯乳酪兩份食玩互餵，甜到漏！
拍劇撻着
人稱「俄仔」的 Ansheles，十八歲時因為喜歡亞洲文化而來香港旅遊，最後樂而忘返，決定留港讀書和生活，每日誠心學廣東話，由當初做模特兒，直到有機會做主持，熱愛拍片的他仲經常自製短片在 YouTube分享，諗頭多多嘅佢，曾邀請媽咪一起試飲中國涼茶，短片令他在網絡爆紅，加上食正港女崇洋天性，人氣急升令他工作接踵而來！
Ansheles最近更有機會拍劇，有份參與 viuTv劇集《迷失假期》，同余安安、邵子風有不少對手戲外，和鬼妹拍檔 Asha（徐[!8EAF]喬）更加過從甚密，上月中二人現身中環 IFC拍拖行街，一見面二人熱情攬到實，又經常情不自禁冧笑對望，俄仔先陪女友去揀衫置裝，再去附近超市買生果，行到攰就轉戰去到附近雪糕店享用乳酪雪糕，二人邊食邊傾全無冷場，熱戀情侶一杯乳酪兩份食， Asha更主動餵男友俄仔食乳酪，冧到俄仔暈陀陀！甜歎個半鐘後，一對小情侶漫步去天星碼頭坐船過海繼續下半場！
孖細妹三人行
拍拖半日，俄仔同 Asha在碼頭吹住海風談心，突然有個外籍靚女加入做「電燈膽」，望真啲，原來係俄仔細妹，由俄羅斯抵港探阿哥的 Ayla，一見面就同哥哥女友 Asha雞啄唔斷，被冷落的俄仔眼見女友能夠融入家中當然唔會呷醋，三人行喺碼頭等船期間仲不停自拍！「俄仔個細妹得十六歲，成日都會飛來探哥哥，之前探班都有見佢來，邵子風仲講笑話對佢一見鍾情，由於靚女關係，個個都叫俄仔帶細妹入行！」知情人士透露。
外表殺食的俄仔，早前出席活動，認識了 Super Girls成員 Heidi，仲成功冧掂對方合作拍片，在俄仔新鮮滾熱辣上載的短片中，同「女神」 Heidi戴上眼罩互摸畫對方肖像，攞正牌抽水。
鍾情單眼皮
俄仔接受《壹》仔訪問，問到佢同 Asha關係，欲言又止的他，勁怕醜用廣東話解釋：「其實我哋喺呢兩個月拍劇，同劇嘅人都 friend咗好多，點解我會同佢一齊出去特別多，因為我哋兩個喺呢部劇入邊都係外國人，容易啲溝通，我有困難嘅時候佢會幫我，因為佢都係識英文同埋比較外國人文化！（拍咗拖幾耐？）我哋唔係拍拖但我哋 friend咗好多！」
再問到有否同亞洲女性拍過拖，俄仔表示：「冇同亞洲人拍過拖，其實無所謂亞洲定香港人，啱你嘅人，佢係咩人都唔緊要，最重要就係你哋有冇嘢溝通，你係咪真係愛同 love each other，我覺得最重要就係你哋嘅 chemistry！」至於睇女的時候，會先留意對方哪一個部位？俄仔就話：「眼！我最重要就係眼，最鍾意就係單眼皮！細個已經好欣賞亞洲人嘅外表！」
網絡紅人
年僅廿二歲的俄仔（ Artem Ansheles），俄羅斯出世，曾移居莫斯科及塞浦路斯，因喜愛香港文化，俄仔 18歲便移居香港發展，操得一口流利廣東話的俄仔，現任 viuTV主持，主持兒童節目《快樂童盟》及《 Girl's Talk》，早前，俄仔製作的短片《挑戰！麥兜×黎根落單一 take過》，以急口令方式成功挑戰「麥兜點午餐」一幕，令人驚嘆，近月，拍攝的《請媽媽飲涼茶》及《請妹妹食糖果》短片，古怪反應，引來十多萬點擊，俄仔火速爆紅，成為網絡紅人。
過江演員
娛樂圈有不少外籍演員，因操得一口流利廣東話而留港發展多年，不時喺大台熒光幕出現，就算講唔出名，大家都梗認得個樣。
喬寶寶
印籍喬寶寶， 05年參加《殘酷一叮》後，辭職懲教助理而加入娛樂圈，其騎呢形象令觀眾留下深刻印象，曾拍過不少電視劇，《怒火街頭》、《巨輪》及《張保仔》等，趁住其知名度，喬寶寶更搞小生意做老闆，賣大閘蟹開果欄，又不時到外地登台搵真銀，賺到笑。
河國榮
已經 52歲的澳洲籍河國榮，三十年前來香港發展，任職英文教師，其後加入無綫成為特約演員，無數次飾演高級督察、英國高官及牧師等角色，深入民心。 02年更參演舞台劇《但願人長久》，去年為圓歌手夢，河國榮於「毛記電視」憑二次創作歌曲《亞視永恒》，更是唱到街知巷聞。
布偉傑
99年由美國來香港工作的布偉傑， 01年加入 TVB就拍古裝劇《騎呢大狀》後，正式開始演員生涯，客串過不少劇集， 06年於《同事三分親》獲「阿一」外號而為人所熟悉，在港足足 18年，布偉傑除咗識講廣東話、普通話及柬埔寨語外，更懂寫中文；今年六月，布偉傑返美國與化妝師女友結婚，更依照香港傳統，在科學園筵開 25席。
撰文、攝影、攝錄：娛樂組
|
鍾意就快D Share啦！
|
|
|
