今晚《同盟》大結局，網民係咁推，半個鐘已經推爆Post，但係呢一個鐘，大家究竟睇咗啲咩？有冇人講得出？有網民咁樣問。
其實就咁嘅，不得不佩服監製文偉鴻，佢真心勁，佢可以用短短三四集，將阿杰——陳展鵬——由忠變奸但原來係表面上奸不過骨子裡又有啲奸仲害死如果太多韓馬利以及俾傳媒吹足一日話佢係真正Rainman嘅林子善，咦，gel晒頭chok晒pose仲唔係真心奸？臨到最尾向四大Boss投誠救母接手做新Rainman…可能陳展鵬都分唔到自己忠定奸。而被懷疑係幕後黑手嘅林子善就先用胸口硬接韓馬利全力插入嘅開信刀，再搶走把開信刀反殺韓馬利，喺胸口開咗個窿嘅情況下走去董事會宣佈自己係主席，點知櫈都未坐暖就被陳展鵬嘅電話嚇到自己搞死自己，中毒變大閘蟹瘋狂嘔泡，哦，IQ140喎。
咁大家日日煲齊齊估邊個係真正Rainman(話唔止江美儀一個Rainman嘛)，2230夠鐘出roller，說好的Rainman呢？結論係：同盟上面仲有個大同盟。而呢個大同盟，就由四大家族執管，除咗李岡同Joe Junior之外，觀眾未必識其餘兩人，仲要熄晒燈懶神秘，最好笑係鏡頭交代兩年後，而班友仲鋤緊dee…副牌局，賭足兩年？
平時無綫好多劇集大結局，都會拉埋成班演員去乜乜商場一齊睇大結局，今次又冇喎……陳展鵬今晚選擇咗同同劇但一早瓜咗嘅張國強一齊睇，仲開Live添…陳展鵬胡定欣呢pair曾幾何時係情侶檔，嗯嗯…
令人費解嘅，何止呢啲？網民都有唔少疑問：
1.點解TVB啲劇，喺停車場一定會被人伏擊？仲每一次都要由頭行到尾，比足時間對方埋伏，明明已經係非常時期都仲泊到部車咁遠。
2.點解TVB啲劇，明明次次都有一大班手下但係次次遇襲都會唔見晒。今次陳展鵬用咗一堆人阻止胡定欣一齊冒險，但係鮑姐身邊得兩三個保鑣。
3.點解TVB啲劇，一定要有偷聽劇情？韓馬利同林子善竟然可以連續兩次被偷聽之後被踢爆，林子善仲強調自己IQ有140。
4.點解TVB啲劇，槍戰一定要揀教堂？究竟TVB呢間教堂做錯咗啲咩？道具組同事啱啱整番靚間教堂嗰頭又亂槍掃射，不過啲木又擋到子彈，制作真係夠晒認真。
5.點解TVB啲劇，都一定要有刀放咗喺台頭構成意外？Anyway，今次係開信刀殺死如果太多韓馬利。
6.點解TVB啲劇，只要聲稱係大制作就一定會死人堆人？有唔少網民以為最後會係一堆人扮死之後喺安全屋開心BBQ。
7.點解TVB啲劇，重遇一定要落雨，而且一定要丟低把遮？陳展鵬同胡定欣重遇之後，把遮一路喺地下，但係佢哋就揀咗要拎件外套避雨。
點解點解點解點解....
| （電視截圖） | | |
| | | |
| | | |
| | | |
|
鍾意就快D Share啦！
|
|
|
